重提出道種種辛酸，樂隊KillerSoap原來試過僅收五百蚊歌酬，又試過攤大手板問家人拿錢，甚至賣車，只為交Band房租金！但今非昔比，這年間在內地人氣急升的他們，目標是「征服世界」，唱上月球！

一首《月半小夜曲》唱爆好聲音，雄心壯志的Rocky要團結一致對抗韓流！

KillerSoap五子理想無限大，一步一步要唱勻全世界！

樂隊KillerSoap最近推出講述成長的新歌《長大就是這樣》，處於「成長」期的他們有這樣的感受：「成長個環境會改變，惟有Keep住一啲覺得啱嘅嘢跟住環境去改變。」而踏入成軍第12年，談及出道的辛酸，主音陳樂基（Rocky）坦言試過要問家人攞錢交約2,000蚊的Band房租，甚至試過賣車交租，而且亦試過開騷沒有觀眾：「2012年我哋搞南京站Tour，臨開騷前都係一個觀眾都冇，我哋都有照玩成場騷，係有少少傷心。」

做個騷得500蚊

全職夾Band做音樂，KillerSoap五子笑言雖仍處於艱難時期，但亦承認自Rocky去年參加內地節目《中國好聲音3》後，他們的收入和知名度亦隨之上升：「我哋試過2013年喺香港出席音樂節表演收500蚊，你問我有冇多咗？（依家）一定有！因為以前實在太過分，計埋搭車每人連一百蚊都冇。」不過他們不會只向錢看，凡有騷都會演出：「我哋想要嘅係經歷，所以唔止內地，邊度有觀眾想聽，我哋就想去嗰度表演。（想去全世界唱歌？）梗係可以飛到最高最遠最好啦！月亮有人我哋都會去！」

大團結抗K-Pop

至於香港Band壇，KillerSoap坦言沒有視其他Band為競爭對手，相反會作為戰友看待，目標是聯手對抗外來音樂：「單一隊Band係改變唔到環境，近嚟韓國音樂係好犀利，所以歌迷會忽略咗本地音樂，好似有啲香港騷試過同韓國歌手同台，凡係佢哋出嚟，啲Fans就嗌到癲咗，但我哋又唔覺得香港啲質素差好遠，香港音樂下滑其中因素，係外國音樂入侵得太厲害，所以大家應該同一陣線對抗外來音樂！」

文、攝：音樂組

化妝、髮型：CY Yim