近年不少星二代如林俊賢女兒林鈺洧、王敏德女兒王麗嘉和上山詩鈉女兒Hilary跑出，前亞姐黎燕珊長女劉詠詩昨日首度行天橋，早年男仔頭的她現已亭亭玉立，遺傳了媽咪的好身材，可惜她無意入行，連黎燕珊也覺得嘥晒！

黎燕珊愛女劉詠詩（左）和龔慈恩的千金林愷鈴一同為日本潮店行騷。

劉詠詩跟媽咪黎燕珊母女檔行天橋。

讀書時代的劉詠詩打扮男仔頭，現在可謂女大十八變！

松岡李那大讚兩位星二代清純無敵。

前亞姐冠軍黎燕珊的21歲長女劉詠詩（Wynce），昨日與龔慈恩的15歲女兒林愷鈴為日本潮店行騷。讀書時男仔頭的Wynce，蛻變成長髮的俏空姐，令人眼前一亮！首次母女檔行騷的她，自言6歲時已踏足天橋，但事隔多年難免有點緊張，但她未想過入行：「我冇諗過入行，我依家做緊空姐，係我由細到大嘅夢想，但覺得今次係好好嘅新嘗試，又可以同媽媽一齊，想藉此Update大家依家嘅自己。」黎燕珊則說：「佢話上網打『黎燕珊』，就出佢嘅相，全部係肥妹仔同男仔頭嘅相，所以好想Update吓自己。」她更大讚女兒值200分超滿分，不參加選美實在「嘥晒」！她透露有朋友拿選美表格給女兒，但Wynce興趣不大：「佢身材好好，應有嘅地方就有，試衫時啲人都話唔選美嘥晒，女為悅己者容，靚嘅嘢應該要同人分享。」Wynce自爆有男友，並已見家長。

15歲的林愷鈴（Ashley）昨日單獨到場，沒有媽咪陪同的她心情有點緊張，但面對鏡頭仍有經驗。對於跟同為星二代的Wynce同場較量？她笑說：「我冇咁諗，唔介意，冇壓力。（你對呢行有冇興趣？）我依家仲係學習階段，學緊建築、音樂，未知邊樣嘢會繼續行落去，我都好鍾意唱歌，最鍾意聽王若琳同鄧紫棋。（想做歌手？）鍾意音樂同做歌手又唔同，我跳舞一般，個人好硬。」

松岡讚清純無敵

同場的日模松岡李那也大讚兩位星二代清純無敵，笑言回想她初來港時行騷，感覺很清新，至於有否向她倆傳授行天橋的心得？她說：「佢哋做得好好，我有喺後台鼓勵佢哋！」活動後她將飛往韓國，表示不擔心南北韓的緊張政局，更開玩笑說不怕「飛（導）彈」！

文、攝：名人組