恒指連跌七日，昨日狂瀉1,158點，共累跌2,767點，樓市隨即受壓，不過王祖藍及葉璇無懼「大風大浪」，勇字當頭入貨，祖藍以1.14億元購入大埔樓花「築愛巢」，葉璇豪花逾4千萬當其西半山業主，然而「樓王」任達華則呼籲大家「睇定啲」！ 文：影視組

王祖藍買下逸瓏灣一個單位，與老婆李亞男組織二人世界，認真大手筆！（資料圖片）

葉璇投資有道，鍾情買磚頭！（資料圖片）

任達華（資料圖片）

股市連日大冧市，搞到股民個個哭股喪！一眾星級投資者即出招「自保」，雖然本港樓市前景未明，作為屋苑龍頭的太古城其中一個高層單位，亦由開價1,820萬減價至1,765萬才成功售出，但王祖藍竟於此時大無畏入市，豪花1.14億購入位於大埔「逸瓏灣」一個面積2,809平方呎高層單位，連3,174平方呎天台，呎價逾4萬元，料為新界分層住宅新高，當其「億元業主」！估計基本首期逾5千500萬，釐印費要四百六十多萬，以年息1.94厘計算，供25年，平均每月至少供款23萬港元。

組織二人世界等生B

身在內地的祖藍昨日接受電話訪問時說：「唔介意（摸頂），我自用嘅啫！諗住遲啲同老婆組織二人世界，有小朋友亦可以用到，總之依家搵錢要再努力啲喇！」

至於葉璇日前則以一身高貴打扮現身西半山瀚然睇樓，對其中一個全新高層單位大感興趣，睇樓後與原本持有該單位的業主達成協議，即場開30萬支票落訂，離開前被對方認出身份，竟搞笑拋下一句：「估唔到依家香港仲有人識我！」據悉，葉璇購入單位呎價高達37,052元，保守估計購入價約4,839萬，相信近年集中內地「搵人仔」的她身家暴漲不少。而日前她則現身貴州出席慈善活動，力撐發起人韓紅。

任達華睇定筍舖

另一邊廂，身為「圈中樓王」的任達華對樓市後市卻有獨特見解：「開始睇吓樓無妨，但適當入市時機最快都要1年後，睇定啲先啦！我鼓勵年輕人上車，但負擔咪咁重，我覺得不妨轉戰上水及元朗等地，長遠有得發展。（呢排睇啲咩單位？）我最想買入中價地舖，近民居有得發展嘛！衣食住行一炮過，都會開始尋覓好嘢喇！」