糖妹前晚在音樂會上玩水戰時被男歌迷射面,右眼被擊中致眼花,幸無大礙,由於由頭濕到腳,「處女額」亦首度曝光,自言沒身材的她,自詡好在有豐滿額。

糖妹與台下觀眾互射,但怕殃及細路而冇報仇。

若琪向台下射水,玩得幾開心!

台下觀眾向歌手射水,糖妹不幸眼中招。

糖妹的「處女額」曝光,又真係幾飽滿噃!

文:音樂組

糖妹(黃山怡)前晚偕同公司歌手若琪及伍浩然出席戶外音樂會,大會提供大量水槍給台上歌手及台下歌迷玩水戰,為酷熱天氣降溫,可是樂極生悲,有赤裸上身的男歌迷向台上的三位歌手狂射水,結果射中正獻唱的糖妹的右眼,令她一度嗆親,險唱不下去,不過專業的她稍一定神又帶笑繼續唱歌,有驚無險。

中招眼前一黑

糖妹昨日接受訪問時說:「射中嗰刻,有少少眼前一黑,好在眨幾吓眼就冇事,冇受傷。(對方係刻意?)我諗唔係,玩吓啫!(有冇射中你身體敏感部位?)冇,台上除我之外,仲有若琪同浩然,都係大家圍攻目標。(有冇射番對方報仇?)又冇喎,因為台下好多小朋友,唔想誤中佢哋。」

自嘲身材似細路

糖妹入行至今罕有露額頭,前晚她將未曾曝光的額頭示人,她說:「因為全身都濕晒,面都濕埋,咪撥開啲『蔭』(劉海)囉!」

糖妹又自讚額頭靚,屬豐滿型,只是以往廣告商戶愛她的「齊蔭Look」才沒有撥開,問到身材是否如額頭般豐滿?她自嘲:「我身材同台下啲小朋友一樣喎!所以唔好攞出嚟嚇人啦!」