「女神」周秀娜事業上不斷有新招,近日更成功在香港開設首間個人內衣品牌實體店,雄心壯志的她揚言放眼東南亞,打造東南亞品牌王國!但原來喜歡創新的她亦有不敢挑戰的項目,便是兼任幕後製作:「做幕後係好專業嘅範疇,但我未夠『精』!」

Chrissie下一步希望打造東南亞內衣王國,果然有大志!

「工作狂」Chrissie亦恨放假,坦言想與家人到陽光與海灘的地方Relax!

Chrissie的內衣品牌生意漸上軌道,令她愈來愈忙。

Chrissie創立自家內衣品牌,更親自做生招牌。

Chrissie暫不打算再出寫真,粉絲要失望啦!

周秀娜(Chrissie)對不少男士而言是「性感」的代名詞,亦是女士相當羨慕的對象,敢於嘗新的她事業上不斷轉型,由口靚模出身,其後殺入影壇,近日連內地真人騷《我們相愛吧》亦向她招手。而她最新傑作便是涉足商界,創立自家內衣品牌,問到下一步有何計劃?Chrissie坦言希望與更多女生分享所愛的事物,並放眼東南亞,打造東南亞內衣王國!她說:「我其實唔係好識做生意,但係搞內衣係因為關乎女仔貼身需要,所以我好希望同更多女仔分享我鍾意嘅嘢,品牌暫時只係喺內地、香港同網上有得賣,老土都要講句始終香港係一個睇住我大嘅地方,個個都好錫我,所以喺呢度開第一間實體舖,我會想去到更多地方,好似亞洲區其他地方,例如馬來西亞、新加坡或泰國。」

拒做幕後未夠「精」

雖然Chrissie對事業野心勃勃,但原來有些範疇至今依然令她卻步,好似近年不少中港台女星演而優則導,或身兼製作人,Chrissie卻謙稱未夠「精」,所以還是先做好目前的工作:「我覺得做幕後係幾專業嘅範疇,雖然我性格算係咩都想試、咩都想學,但好多都唔『精』,平時拍戲會知道有邊啲崗位嘅人,做緊自己專業範疇嘅嘢,我會觀察同問佢哋做咩,但依家都係將最想做嘅演藝事業做到『精』先,得到更多人認同,或者自己滿意先。」

無意再出寫真

Chrissie源源不絕的新嘗試固然教人驚喜,但說到其威水事績,不少人均會想起她早期出寫真的話題招數,更成功掀起「周秀娜現象」!不過近年Chrissie似乎退下戰線,究竟是否因為今日的Chrissie已經變得惜肉如金?將來的日子又會否再次披甲上陣?她有這樣的想法:「我暫時未有呢個(出寫真)計劃,因為之前出過寫真,畀大家認識咗我,其實後來有出過一本關於自己幾年間心入面諗法嘅書,大家知道另一面嘅我,所以反而依家想做吓其他嘢,因為我鍾意新嘗試、新挑戰。」不喜歡重複是Chrissie的宗旨,若果不出寫真,而是出書分享「周秀娜成功之道」呢?她說:「如果再有人搵我寫都可以分享吓,可能純粹寫吓自己啲嘢,或者講吓女人經,但當然再儲多幾年經歷先啦!」對Chrissie粉絲而言相信同樣值得收藏。

盼帶家人旅行

一說到工作便雙眼發光,Chrissie似乎樂做天生工作狂,但女神有沒有放過假?她笑言擔心放假會「做死其他同事」,但的而且確女神都想放假,更想將假期獻給陽光與海灘和家人:「講真我鍾意做嘢,畀自己Keep住郁,上次放長假已經係新年嘅事。如果真係要休息,可能會旅行,特別想趁夏天去啲陽光與海灘嘅地方,因為喺香港好少曬太陽、出海,人大咗,覺得自己有能力,希望可以帶埋屋企人去旅行。」原來對Chrissie而言,下一步大計不是有甚麼新工作,回饋家人才是最重要。

後記:性感由內而外

有人說「認真工作的人最性感」,出道初期的Chrissie或許因為經常穿比堅尼、大騷Hot爆身材而令人覺得性感。今時今日,Chrissie的演藝事業如日中天,內衣品牌生意亦漸上軌道,但她愈忙愈有幹勁,凡事親力親為,投入二百分的認真,人人都說她「性感」,而事實上Chrissie只會愈來愈性感,令人愈來愈愛。