曾是一名肥妹仔的丁悅靠控制飲食而激減三十磅，不過為派台歌而積極練舞的她仍未滿意身形，專誠找教練教導「街頭健身」（Street Workout），更有意跟潮流練出馬甲線！

平板支撐看似簡單，但相當費力。

丁悅健身亦不忘練習舞蹈。

丁悅做運動前先拉筋熱身。

高抬腿及下蹲都能操練腿部肌肉。

捲腹除能練習腹肌，亦有助收緊臀部。

與Eric Ng做雙人平板支撐的丁悅擔心體重令教練難以負荷。

單手撐地的側腹姿勢，收緊兩邊腹肌。

雙槓撐體練三頭肌，減Bye Bye 肉。

丁悅利用單槓練臂力。

新進歌手丁悅近日為了第二首派台歌而積極練舞，專誠找來教練Eric Ng教導香港近年非常流行的「街頭健身」，希望塑造更Fit的身形配合舞蹈。問到最想鍛煉的部位，她透露除想收緊臀部外，更有意練出馬甲線：「因為我懶，成日坐，雖然我唔算大Pat Pat，不過都唔係Firm，所以想Firm啲，有時着一啲緊身嘅連身裙，成個Body嘅線條出啲嘅話會好睇啲！同埋依家開始好多女仔唔只係要騷纖腰咁簡單，仲進化到要有腹肌線，啲線條好靚，我覺得望落去係非常性感！」

唔想臨急抱佛腳

談到跳舞，丁悅最喜歡跳Jazz Funk和Girl's Hip Hop，又坦言以前曾經斷斷續續學習舞蹈，直至最近才重拾動力：「以前可能學咗幾個月又停一年，不過入咗行之後覺得作為一個歌手嚟講，跳舞係好重要嘅，都會期待將來會有自己嘅演唱會，如果真係要發生，都冇理由臨急抱佛腳先嚟學，所以要裝備好自己先！」而學舞的另一動力是來自容祖兒，視之為偶像的她欣賞祖兒一直非常努力，並樂於挑戰自己：「睇過佢咁多場演唱會，每次見到就會幻想自己喺台上嗰度又唱又跳，就會好想逼自己即刻學跳舞，尤其係佢會做好多高難度動作，呈現出嚟會令大家嘩一聲，目瞪口呆！佢跳嘅舞令人覺得佢好努力，最值得欣賞係佢每次都超越自己嘅能力。」

抗拒大隻肌肉男

問到有否特別偏好運動型的男生？丁悅即落閘，呼籲喜歡做運動的男生不要對她有興趣，原來平日甚少做運動的她擔心另一半會強迫她一起運動：「有時睇片啲情侶會做一啲Couples Workout，但我唔係呢類型人嚟！好似啱啱同教練做一啲雙人動作咁，我係好擔心佢嘅生命安全，我覺得自己好重，太危險喇！」她更坦言不喜歡肌肉男，不明白為何香港女士對「某牌子」的猛男模特兒趨之若鶩：「如果佢哋出現喺我面前我唔會有衝動想摸佢哋，反而仲有少少驚太多肌肉嘅男仔，因為好似石頭人同變形俠醫咁！」

文：音樂組

攝：張福宏

場地：The Playground

髮型：Base@iHair