女星雨僑、林芊妤（Coffee）及唐貝詩昨日為新片玩瑜伽造勢，面對瞓身騷胸的Coffee，自嘲骨頭硬的雨僑惟有盡力而為，穿了3件衫打底的她比起Tube Top上陣的Coffee明顯輸蝕，不過她大談緋聞男友羅力威，搶回焦點！文：影視組

林芊妤指導雨僑做動作，好有瑜伽導師風範！

雨僑動作生硬，惟有靠講「男友」搶焦點！

林芊妤和唐貝詩在一班猛男擁護下玩遊戲。

雨僑、林芊妤及唐貝詩昨日到荃灣宣傳新片《猛龍特囧》，與一眾網絡男神參賽者玩高難度瑜伽動作，雨僑自嘲骨頭硬，做動作時十分吃力，至於唐貝詩做開瑜伽，拗腰拱橋勉強OK，而開班教瑜伽的Coffee左扭右擰，腳擺上頭，技驚四座。

嘴角向下累事

雨僑坦言怕走光：「着咗3件衫，提咗唔好做咁多烏身動作，要盡量簡單。（上次淺水灣宣傳露缽仔糕留陰影？）嗰次我叫助手買膠紙，佢買咗啲用唔着嘅返嚟，所以我冇黐到，但我冇炒佢，佢成日畀笑料同歡樂我！我貼咗同佢嘅合照出嚟，但網友好奇怪，以為佢係羅力威，連我家姐都打嚟問咩事！我都寫明係助手啦！（邊個先係男神？）男神準則要好似張智霖咁，靚仔、好人、好脾氣。（羅力威被指經常黑面？）唔係，佢係天生嘴角向下，呢個係佢放鬆嘅表情，佢對住記者冇防範，至咁放鬆啫！」

Coffee學生最多佬

Coffee則讚雨僑有瑜伽天分，自爆負傷上陣的她說：「我尋日影相做瑜伽，唔小心整傷右腳，我以前成日拗柴，我以為拗一拗冇事，但頭先做動作有啲痛，未睇醫生未知嚴唔嚴重。我有私下教瑜伽，希望冇影響，之前出活動走堂，學生都有微言。（男學生不滿？）我有一半學生係男仔、男人，或者可以叫做佬。（殘廁新聞吸引佢哋睇你做瑜伽？）唔知，但我上堂好密實，好多學生上完第一堂都話好舒服，我哋仲做埋朋友。」