陳智燊澳洲快閃求婚 宋熙年收20卡鑽戒
去年承認與宋熙年拍拖的陳智燊（Jason）前晚在網上大晒「20卡」鑽戒，高調宣布成功求婚！趕拍新劇的Jason為籌備驚喜求婚，早前臨時向劇組請假，即日人肉速遞來回香港、澳洲「快閃」求婚，用誠意打動女友Say Yes！打算於兩年內迎娶女友的Jason，更揚言婚後要生四個！ 採：影視組 文：專案組
陳智燊打算兩年內迎娶宋熙年。
陳智燊（左起）送上「20卡」鑽戒向宋熙年求婚，宋熙年妹妹、宋父及宋母在場見證。
高海寧、Jason、金剛和小儀等昨晚出席劇集煞科宴。
現年37歲的無綫藝人陳智燊與30歲前華姐冠軍宋熙年（Sarah）自去年8月公開戀情後，一直屢傳婚訊，進展神速的二人終有「嫁」期！Jason前晚在微博晒出與Sarah的面貼面合照，並宣示主權：「She belongs to me.（她是我的！）」相中所見Sarah的左手無名指戴有鑽戒，原來他已在上月21日成功求婚！
Jason事後接受本報電話訪問，開心Share今次「快閃」求婚之旅。忙拍新劇的他，得悉女友回澳洲為宋爸爸慶祝生日後，特地向監製徐正康請假兼即日來回香港澳洲，為女友炮製驚喜求婚！
宋爸爸撞破
為免洩漏風聲，Jason請監製幫忙保密，又瞞住女友家人悄悄進行：「知道宋熙年會去嗰間餐廳同爸爸慶祝生日，就早佢一班機去到餐廳門口等佢，唔知佢班機Delay，照拎住紮花喺門口等。」正當Jason在餐廳正門癡癡地等，卻被宋爸爸意外撞破：「佢哋由停車場入到餐廳見到我喺門口，佢爸爸仲話：『嗰個咪係Jason？』超尷尬！」他隨即在女友步出餐廳時送上鮮花及戒指兼跪地求婚，冧得伊人感動落淚！他說：「緊張過拍嘢，唔流暢咁講晒心底嘅嘢出嚟，人哋話求婚浪漫，唔到自己做唔知會超緊張！（點解揀呢個日子求婚？）當住佢爸爸媽媽面前有意思啲，完成晒好似發緊夢。嗰日朝早9點起程，晚上9點返到香港拍劇，好趕。」
婚後生四個
他又自爆曾在腦中預習求婚：「上飛機嗰陣腦海閃過電影橋段，個男主角將戒指放喺篋唔見咗，本身我都放篋，上機就擺番喺身，瞓覺好驚唔見戒指，壓力好大！諗番個過程都幾搞笑。」
而Sarah受訪時亦坦言驚喜：「知道Jason拍劇好忙，所以我一個人返嚟悉尼同家人慶祝，點知原來佢早有安排！瞞晒所有人！非常細心！好感動！呢個生日十分難忘！」更笑謂父親對未來女婿相當滿意：「求婚當日係我爸爸生日，佢笑到見牙唔見眼，應該幾滿意。」惟問到戒指卡數時，她大賣關子：「哈哈！20個卡！因為我笑到『卡卡卡卡卡…』」Jason昨晚出席《愛》劇煞科飯局時仍拒透露戒指卡數：「Sarah收得貨都唔會太細，同埋戒指係6爪設計，粒石都要大啲。嚟緊會再去珠寶店，因為Size有啲鬆。」
曾笑言要儲錢擺酒的他，有意兩年內娶Sarah過門：「嚟緊有新劇開，做到年尾，希望兩年內搞掂！」喜歡小朋友的他更揚言要生夠四個！
