張智霖表姐上山詩鈉的18歲女兒Hilary，前日孖住媽咪到中環濕平，熱褲上陣的Hilary，雖然露出一雙「肉」腿，但靚樣搭夠，兩母女逛完名店再買護膚品，然後往首飾店睇珠寶，未幾已滿載而歸！

Hilary晒腿行街，雖然有點肉地，但有靚樣搭夠！

Hilary認真挑選心水貨品，一會已與媽咪掃滿一袋二袋。

Hilary和媽咪到首飾店睇珠寶。

文、攝：追蹤組

已轉行保險從業員的前女星上山詩鈉，母兼父職湊大女兒Hilary，不知不覺已18歲，長得亭亭玉立，Hilary樣貌標致之餘又有禮貌，加上是王菲女兒童童由細玩到大的好姊妹，近期經常成為傳媒焦點。

主動拿戰利品

即將往美國升學的Hilary，前日與媽咪前往中環Shopping，兩母女先往名店睇鞋，未幾已買下心頭好，乖乖女Hilary主動拿着大袋戰利品。當日見Hilary以熱褲上陣，自稱有Keep Fit的她，雙腳看來甚有肉地，但勝在笑容甜美靚樣搭夠，難怪吸引不少男途人目光。

不忘隔空傳情

她們行完名店便轉場選購護膚品，兩母女更不時一起研究，步出時見到記者拍照，上山及女兒均笑笑口打招呼，其後齊齊到附近首飾店睇珠寶，逛了約一小時，已買到一袋二袋，收穫甚豐！雖然兩母女各自拿着戰利品，但不忘拖手並肩而行，可見母女情深。行到攰時，她們步入餐廳醫肚，期間見Hilary自洗手間步出時，正低頭按電話，未知是否與男友傳情呢！