o靚模盧頌之上月疑在公路展開爆粗版「亡命飛車」致炒車，最終涉醉駕被捕，更累借車的拍檔陳達仁的40萬名車報銷兼骨折。陳達仁稱盧頌之曾承諾賠償，但她後來自稱與男友趙勁皓分手，疑似反口走數！文：音樂組

DaDa上月底炒車以致陳達仁骨折。

本報在網上發現一段約1分36秒的炒車片段，片中可見滿面通紅的盧頌之（原名盧燕宜、DaDa）握住軚盤，與友人高談闊論並爆粗說：「你又拍片，你係咪醉Ｘ咗啦？」車內其中一男子突然驚呼：「急彎呀！真係慢啲，甩尾呀BB！」另一名男子接着說：「我真係好驚，之前有咩做錯、得罪嘅，對唔住！慢啲！」但她未有理會，男子不停嗌「喂！喂！喂！」隨即發出巨響，車頭安全氣袋彈出，DaDa即問：「我哋係咪撞咗車呀？」

據悉DaDa與DJ陳達仁合作主持電台節目成好友，上月25號凌晨，DaDa曾借用陳達仁弟弟價值40萬的Audi A5名車駕駛，同車除兩人外還有另一名男子，在青山公路懷疑意外自炒，撞到防撞欄嚴重變形，達仁右手手臂骨碎裂。警方調查事件時，DaDa涉嫌酒後駕駛被捕，據警察公共關係科表示當日一名女子「Lo x Yee」聲稱為閃避一輛切線的私家車而失控撞欄，警方到場調查，司機未能通過酒精呼氣測試，涉嫌酒後駕駛被捕，車內一名乘客陳Ｘ仁手臂受傷。

40萬名車報銷

昨在家中休養的達仁，承認當晚與DaDa完成節目後，與另一朋友飲酒消遣：「當日係佢主動話要揸車，之前都借過畀佢，冇問題，雖然知佢同朋友叫咗一桶啤酒，但唔見佢飲酒，身上冇酒味，所以先借畀佢。」他憶述當晚DaDa愈揸愈快致炒車。

事後DaDa曾表示會賠償，強調會分期付款找數。但其後她在醫院與達仁女友見面時改口風，建議對方向保險公司索償，之後再向她追數時，自爆與男友趙勁皓分手「人財兩失」暗示拒絕作出賠償，達仁指她對朋友說：「我冇能力賠償，冇錢，同男朋友分咗手，屋企經濟又唔好。」問到可會追究到底？達仁說：「DaDa嘅反應令我好心痛。」DaDa則透過電話回應承認發生了意外，已交由律師處理。