梁漢文（Edmond）昨日為下星期開騷的《梁漢文紅館中場表演2015》綵排，隆重其事的他可謂搏到盡，踏上第一次減肥之旅。密密操肌的他雖坦言個唱服飾冇乜睇頭，但擺明向杜德偉挑機，或效法對方在個唱尾聲「脫掉」。文：音樂組　攝：林蔚恩

梁漢文綵排時拉起女舞蹈員三百六十度轉。

笑言好耐冇食過菠蘿包的Edmond終於如願以償。

杜德偉開騷時曾剝剩底褲騷肌。

梁漢文與舞蹈員落力綵排，希望演唱會盡善盡美。

梁漢文昨日為本月11及12日的《梁漢文紅館中場表演2015》演唱會進行綵排，並預演一首歌，見他雙手拉起女舞蹈員三百六十度轉，看來操練成效不俗，而他亦透露為了個唱首次執行減肥計劃：「我好耐冇食過菠蘿包，呢個幾月係我人生食得最少嘢嘅日子，依家好落力跑步，以前我做好多唔同運動，依家怕受傷就淨係游水同跑步。」

跑步重現腹肌

問到是否因中年發福而的起心肝減肥？他笑說：「可能係！由2012年演唱會開始我有舉重，開完騷就舉得仲犀利，好似外國人咁舉，啲肌肉舉到大晒，好難收，所以今次就跑步收番，啲腹肌開始出番嚟。」至於會否騷肌展示成果？他笑言服裝沒甚麼可露的地方，但辛苦練來的腹肌不會浪費掉：「可能到最尾我會效法杜德偉，脫掉！我今次要贏杜德偉，佢話會嚟睇，我就挑戰佢！」

拒夫妻檔上台

談到減肥餐單，他透露太太每朝都為他製作奶昔，午餐因受早前重播劇《他來自江湖》影響只食兩條大肉腸，晚上則近乎禁食。講到太太悉心製作飲料，問到會否在個唱上唱情歌冧太太？他自爆太太有對他暗示：「其實唔係我想。（佢逼你？）佢冇明講，係排舞師話不如叫老婆上台，本身有隻歌係講太太，但我哋梗係唔制，可能到時你哋的佢上台，佢就實上。」