新一代女神陳瀅懶理吳若希和溫家偉緋聞鬧得熱烘烘，日前獨自殺落溫家偉的雪糕舖，和大隻仔旁若無人地黐實玩自拍，正當他們在舖前溫馨，同時發現湯洛雯於店內餵羅天宇食雪糕，相當冤氣。 文、攝：追蹤組

主動落舖的陳瀅有溫家偉獻殷勤，笑得開心。

陳瀅和溫家偉黐實自拍，非常親暱！

陳瀅邊食雪糕，邊與溫家偉密密傾。

吳若希

樣靚身材正的陳瀅憑劇集《四個女仔三個BAR》成功上位，緋聞不多的她原來對肌男情有獨鍾，最近似乎睇中大隻仔溫家偉，懶理他和吳若希正傳緋聞，趁吳若希忙於工作即主動往大隻仔雪糕店親近男神。

飛奔迎接獻殷勤

當日下午3時許，陳瀅於尖沙咀出席活動後，先到髮型屋扮靚，再去行街及醫肚，之後即駕車直駛溫家偉的雪糕店。她甫泊好車，已見大隻仔飛奔出來迎接，相當殷勤的大隻仔先招呼她入店內，再親自裝招牌雪糕冧女神。陳瀅捧住溫家偉送上的雪糕，未食已不停甜笑，輕輕食了兩啖便取出相機要合照，他們隨即頭貼頭黐到實自拍，大隻仔更將頭枕在陳瀅膊頭，親暱得旁若無人，影完相再站在店外細聲講大聲笑，及至有街坊認出要求合照，他們又如孖公仔般有求必應，幫舖頭做生招牌。

AB餐唔識揀

記者致電溫家偉，問到陳瀅主動接近，會否對她有意思？他傻笑一番後說：「我哋兩個係好朋友，嗰日陳瀅搵唔到間舖，我先專登去接佢。（驚唔驚吳若希呷醋？）吓！哈哈哈！應該冇嘢！（如果陳瀅同吳若希兩個AB餐畀你點揀呀？）嘩！我唔識答喎！你唔好叫我揀啦！」

至於被「撬牆腳」的吳若希（Jinny）昨日接受電話訪問，問到大隻仔背她跟陳瀅在雪糕店約會，她澄清大家只是朋友：「每個人都有識朋友嘅權利，明顯佢依家有啦。」更指雙方不是情侶，故不存在「男友」被搶走之事，又叫兩人「玩得開心啲」。