名模馬詩慧女兒王麗嘉擁5呎11吋身高，惟上圍達34D的她卻認為甚有負擔，為闖國際天橋，她更有意做縮胸手術，而向來思想開放的馬詩慧亦表示會尊重女兒三思後的決定！文：名人組

一心踏上國際天橋的王麗嘉，想縮胸減輕「負擔」。

今期《好報》披露王麗嘉為實現超模夢而計劃縮胸。

王敏德及馬詩慧的愛女王麗嘉遺傳了父母的星味。

上山詩鈉表示只要Hilary大學畢業，便不介意她入行。

父母總希望兒女成才，一眾耀眼的星爸媽亦一樣。名模馬詩慧（Janet）女兒王麗嘉（Irisa）、藝人上山詩鈉女兒Hilary及前港姐鍾慧冰的女兒，憑着甜美樣貌及Fit爆身段，在渴市的娛樂圈中成功突圍，成為矚目的「星二代」！

「幫佢搵醫生」

日前她們接受《好報》訪問，其中現於美國留學的高妹Irisa一直希望繼承母親衣鉢，成為炙手可熱的模特兒，為此更不惜停學一年到紐約追尋夢想，目標是成為國際品牌Victoria's Secret（VS）內衣騷的Model。高5呎11吋的她身高標準，但卻因34D上圍過於豐滿而感苦惱，認為阻礙成為High Fashion Model，故考慮接受「縮胸」手術。對此，母親Janet笑說：「佢成日都咁講，我同佢講等大個再諗清楚啲先，如果真係有咁嘅一日，我都會尊重佢，我都知胸大負荷好重，特別做運動會好辛苦，到時會幫佢搵多啲資料，搵個穩陣信得過嘅醫生。」

Irisa受訪時，批評母親當年因思鄉而放棄國際舞台是「Bad Choice！」Janet則強調沒有後悔當年的選擇，她認為人各有志，本身是個着重家庭多於工作的人，她說：「我唔係一個好有野心嘅人，如果當年唔係咁揀，我又點會有三個小朋友，呢啲係命中注定，後悔只會令人覺得唔舒服。」Janet表示對女兒充滿信心，認為她有做Model的潛質。

畢業即過關

此外，過來人上山詩鈉亦表示若女兒Hilary有興趣入娛樂圈也會予以支持，但條件是要先完成學業，她說：「始終都要大學畢業，最基本要求。」問到是否認為女兒適合做娛樂圈？她笑說：「暫時影吓硬照，拍吓廣告係OK，但拍戲我就驚佢未識去Handle。」