昨日唐詩詠與張繼聰齊齊到新達廣場預演沙灘派對，唐詩詠大呻「男友」洪永城最近因拍劇變得生人勿近，要暫時「隔離」！而張繼聰則繼續Sweet爆，不停將太太謝安琪掛在口邊，大讚「世上只有媽媽好」！文：音樂組　攝：司徒國榮

唐詩詠和張繼聰手執沙灘波，大家準備好「迎戰」未？

已為人父的張繼聰照顧小朋友駕輕就熟，反觀唐詩詠就顯得不知所措。

唐詩詠與張繼聰甫現身即吸引大批市民圍觀！

落力接波的唐詩詠大騷小蠻腰和長腿，索呀！

藝人唐詩詠和張繼聰昨日到大埔出席《新達廣場 x Rody夏日沙灘派對揭幕禮》，兩人以一身沙灘Look為活動帶來夏日氣氛，唐詩詠表示因家人反對，故從未試過到沙灘游泳，她透露今年打算「處女下海」，穿上比堅尼到沙灘舉行派對，問到可會叫緋聞男友洪永城一齊參加？她笑說：「邊個有時間咪叫邊個去，又唔知佢識唔識游水，陣間佢浸親要我救番佢轉頭就唔好啦！」

外遊賣甩洪永城

問到唐詩詠最近可有忙裏偷閒與洪永城約會？剛拍完劇集《公公出宮》的她大呻對方近期因拍劇太投入，性情大變：「好似嚴肅咗，未有時間同佢相處，但睇相覺得佢好唔同，都係等佢拍完先搵佢。」她又表示將會有個悠長假期，雖然未有明確目的地，但計劃賣甩洪永城獨自做背包客。

賣口乖讚老婆偉大

而同場的張繼聰笑言在家中擔任「戶外部大臣」，近年也有帶囝囝張瞻到沙灘玩：「戶外好似男仔啲，有時都會同埋太太（謝安琪）去，不過佢嚟親都好易畀人發現。」他又自言是豪放派，每逢到沙灘必定赤身露背，問到是否以三角泳褲上陣？他笑說：「都係着番衝浪褲，因為划艇仔嗰啲活動怕會走光。」問到暑假可有為囝囝計劃課外活動？他直言要看囝囝意願，有學溜冰和踢波，更乘機大讚夏日炎炎都帶囝囝去學踢波的太太母愛偉大。