「性感女神」周秀娜去年底建立自家內衣王國，由網店發展到實體店，所謂「力不到不為財」，除作「人肉生招牌」外，她日前更到尖沙咀「微服巡舖」，落手落腳執Bra兼做埋收銀一腳踢，她表示新舖投資逾百萬，不成功便成仁！文：專案組

Chrissie憑驕人身材打響名堂，近年更涉足商界開舖做老闆娘，並希望可於三年內上市。

Chrissie落手落腳執Bra上架，更細心地整理。

Chrissie在收銀處看店舖圖則和單據。

Chrissie見試身室旁有其內衣肖像作「生招牌」時，甚感滿意。

Chrissie連搬貨亦不假手於人。

周秀娜（Chrissie）憑32D驕人身材打出名堂，除出寫真為她贏盡名利外，早年又成立「周秀娜工作室」轉型做演員，近年更涉足商界做老闆娘，去年底建立自家內衣品牌，主力以網購為主，更獲美國金主睇中注資5千萬港元，並希望可於三年內上市。

早前揚言希望可以在年底開實體店的Chrissie，原來已達成願望，日前傍晚她現身尖沙咀，在助手陪同下走入一個小型商場，「微服出巡」到自家內衣品牌LAANAA首間實體店視察。

雖然舖頭仍處於試業階段，但亦不乏顧客問津，當老闆娘Chrissie甫現身，店內員工便上前打招呼，又向她遞上店舖圖則和單據，並帶她視察店舖狀況，Chrissie一度走入試身室和其他角落，當她見到試身室旁有其內衣肖像作「生招牌」時，即展露滿意笑容。

多番提點員工

其後Chrissie走到收銀處詢問員工狀況，當時剛好有顧客想付款，她即以老闆娘身份親身示範收銀。其後她走到貨架前研究一會，似乎對貨物擺放位置不太滿意，於是落手落腳執Bra上架，並且多番提點員工，表現甚有耐性。據知Chrissie今次為新舖投資逾百萬，所以事事親力親為。

事後本報致電Chrissie，詢問有關新舖開張事宜，她說：「新舖好快開張，自己都緊張，因為話晒係第一間實體店，都想正式開張前再去望一望，等個心定啲。（新舖預備成點？）依家我哋係試業階段，基本上已經有客人上嚟睇，之前做網店有好多女仔問過會唔會有舖頭，或者幾時開，佢哋都好想過嚟，其實依家新舖已經Ready，係差啲細節位，可能再觀察一排先。（預計幾時開張大吉？）預計今個月內。」

最滿意試身室

Chrissie又透露日後亦會經常「微服巡舖」，因想聽取客人意見：「我好鍾意個試身室，我係女仔會想好似入到自己嘅衣帽間咁，嚟緊睇吓反應點，再聽埋唔同女仔嘅意見，希望大家嚟到有返屋企感覺。（投資幾多錢？）實際投資幾多我都唔清楚，因為有同其他人合資。（你拎幾多錢出嚟？）生意都係一路慢慢投資上去，第一間舖都想『靚靚仔仔』咁同大家見面，嗯……投資少少啦！淨係舖頭都過百萬。」