陳庭欣2010年奪得香港小姐冠軍後正式投身娛樂圈，她坦言入行後工作忙碌，已甚少機會下廚，今次抽空親手製作朱古力布朗尼感到十分高興！她又愛為男友準備愛心餐，旨在箍住男友個胃，令他每口食落肚都甜到漏！

Toby親手製作朱古力布朗尼，不知味道如何？

Toby專心聽導師講解，務求製作出色香味俱全的布朗尼。

Toby不時炮製愛心餐給男友翟威廉，認真Sweet！

Toby（左一）拍攝《公公出宮》時與姜大衞等前輩演對手戲，獲益良多。

Step.1 朱古力用熱水坐熱，溶化後放入牛油攪拌。

Step.2 朱古力粉和低筋麵粉一起篩入攪拌盆。

Step.3 蛋黃和沙糖加入另一攪拌盆，用電動攪拌器攪拌至淡黃狀。

Step.4 在另一個盆中加入蛋白和沙糖，用高速攪拌製作蛋白霜。

Step.5 將（3）加入（2），再把蛋白霜分2至3次加入，用膠刮攪拌均勻。

Step.6 倒入焗模中，放入焗爐用攝氏160度焗40分鐘。

Step.7 蛋糕冷卻後加以裝飾。

前港姐冠軍兼無綫小花陳庭欣（Toby）入行後工作忙碌，愈來愈少機會親自下廚，今次專誠學整朱古力布朗尼可謂相當難得：「依家工作比較忙，都少咗下廚煮飯食，多數都會出去食。以前喺外國讀書時住宿舍，唔慣食Canteen啲嘢就會自己煮，尤其係讀大學時搬咗出去住，就更多時會自己煮，因為出去食太貴喇！負擔太大。」

「煮家男」加分

雖然Toby從未承認與緋聞男友翟威廉拍拖，但關係已算是半公開，是圈中公認的一對，她說：「現階段感情生活都滿意，平淡咁過就OK。」她又表示會煮愛心餐給男友，多會炮製家常小菜：「都試過煮飯畀另一半食，多數都係家常便飯，但係同一啲菜式煮得太多我又驚佢覺得悶，自己唔識時就會上網Download啲食譜照住整，通常啲網上食譜要好多特別材料同配料都好難搵得齊，10樣都會差兩三樣，所以個味道未必係最好。」她又分享送禮心得，坦言最緊要實用：「都係送吓衫、外套、銀包呢啲普通得嚟又實用嘅嘢。」

Toby又笑言若另一半是「煮家男」會加分，能夠與對方一齊煮飯再品嘗是甜蜜的事：「另一半識得煮嘢食就當然加分，男仔識煮仲要煮得好味真係好難得！我曾經有位前男友識得煮好好味嘅三杯雞，但係我又唔食得辣，佢每次都遷就我口味唔整辣。其實都幾Sweet！大家一人整一個餸再一齊食。」

新一屆香港小姐又再展開，是非不斷，Toby回想當初參選時亦有所感慨：「當年參選都好多新聞報道，有正面有負面，我唔會介意，入得呢行都預咗，最初都有唔開心，依家就明白做Artist有新聞係應該開心，冇新聞、冇話題性先慘，依家睇完就算，唔會Mind咁多。」

誤打誤撞入娛圈

而她參選的契機全因為「多事」的朋友，但慶幸因而學到很多：「當年係以前做Head Hunter（獵頭公司）時有同事幫我遞表參加，初初只係想敷衍一下，真係有回覆先再算，而我家人都好支持我參選，就咁誤打誤撞下入咗行。參選再入行對我人生好大改變，首先係工作上轉變啦！同埋參選頭嗰幾個月去特訓已經學到好多嘢，睇到好多未見過嘅嘢，喺幾個月入面有好多知識濃縮咗變成精華咁入咗個腦，呢啲可能係人哋好多年都未必學得晒。所以令我成長得快咗好多，好多以前幼稚又低B嘅壞習慣都一次過改變晒！」

愈來愈多拍劇機會的Toby，從小到大都未想過入行，至今仍覺得拍劇是一件困難的事：「從來都覺得喺電視同報紙上出現嘅明星同我距離好遠好遠。拍劇壓力好大，初初入行多數做MC，慣咗做主持時嘅工作模式同說話技巧，而拍劇無論喺時間分配以至講嘢語氣同表達感情都同平時唔同！最好就同人傾吓，傾得多就會明，到依家我都覺得好難，但學識咗最緊要係放輕鬆，背熟對白當然重要，但更重要係你Show到句對白背後嘅意思。」

演民初劇具挑戰性

《公公出宮》對Toby來說是一個全新的挑戰，經常拍時裝劇的她說：「我拍《公公出宮》喺戲份上都比以往嘅劇多咗，但呢套係一套民初嘅劇，我從來都未接觸過，所以好大挑戰性！但遇到好多好戲嘅前輩，就算自己唔係埋位拍，喺場外望住佢哋拍都吸收到好多。」