何浩文（Dominic）憑電影《鴨王》上位，昨日《好報》獨家披露他在4個月內穿梭神州出騷狂吸480萬人民幣（約600萬港元）！有傳導演王晶將開拍《鴨王2》（暫名）再搵他做男主角，片酬加至近百萬！

《好報》披露何浩文勁賺600萬。

現年26歲的何浩文入行7年苦無機會，今年憑擔正電影《鴨王》一「舉」成名，昨日《好報》披露他不停往返中港兩地，4個月內登台80場，喪搵約600萬港元！有指年底開拍《鴨王2》，王晶有意再找他做「鴨」，據知他的片酬由原來的30萬元急升至近百萬元，足足多了3倍！

想「翻撻」Jeana

對此Dominic笑說：「加咁多？多謝晶哥賞識，真係咁高當然會更畀心機做！（最想同邊個女主角合作？）想同女神韓國歌星IU合作！不過佢上咗神枱喇，實冇我份！」又樂意與何佩瑜（Jeana）「翻撻」，並羨慕李治廷與范冰冰合作。問到王晶是否有意開拍，他說：「未傾，最快都9月！（畀3倍片酬？）佢係我旗下藝人，價錢使乜同佢傾！」

計劃日本買磚

Dominic返內地出騷雖每次唱一小時，但舟車勞頓唱到發燒，更被摸Pat胸襲當真「鴨」！內地Z姓富婆掟100萬人民幣邀他出海扮船長任舞，但Dominic堅決永不賣身：「上月推咗之後冇再收過神秘電話，依家凡親冇來電顯示嘅都唔聽，公司電話亦會進行嚴密保安，同事幫我擋咗啲無聊電話。（出300萬叫你上遊艇會唔會心動？）唔會！我都係自己搵錢，呢啲『辛苦錢』冇資格賺，我拍戲、唱歌同登台都會賺到。（買樓？）目標係搵到1千萬置業，想喺日本買，最有升值能力！」