「美心妹妹」Celine的寫真照備受爭議，圈中不少已為人父母的藝人亦有關注事件。

林盛斌（Bob）：「我有睇過啲相，但冇了解過意識嘅問題，畀我就唔會影，同小朋友留回憶有好多方法嘅，例如帶佢哋着得靚靚哋去影家庭照，有時我都會同小朋友影家居照再擺上網，不過會小心選擇。（有冇人想幫佢哋出寫真？）我唔會畀佢哋影，因為冇咁嘅需要，犯禁嘅嘢我唔想做！」

陳琪：「睇完啲相覺得媽咪嘅防線唔夠緊，依家社會有唔同嘅睇法，父母作決定前要諗多啲，依家社會風氣係唔着衫影相先有題材，小朋友係擺可愛樣，但影嗰個就影得性感，我第一眼睇係覺得靚嘅，但點解有啲角度會咁影？希望社會唔好再批評Celine同Celine媽媽，大家都係想保護Celine，放過佢啦！第時Celine返學都會有壓力。」

楊思琦：「我冇睇過啲相，難去評論，如果影出嚟係陽光同健康嘅都可以。（畀個女影？）影出嚟係健康、適合佢年紀嘅都可以！」