《陪着你走》、《一生所愛》及《憑着愛》等經典歌曲時至今日仍為人熟悉，不過竟未有一首能令作曲人兼原唱的盧冠廷覺得驕傲！自我要求極高的他近日再度踏足樂壇，他透露曾因壓力而生蛇，但仍不斷尋求提升音樂的方法，明言要以做出值得在世上留低的音樂為目標！

盧冠廷相隔多年再出碟，樂迷又有好歌聽！

盧冠廷談起音樂時，相當認真！

盧冠廷（LoLo）相隔廿二年再推出新碟《Beyond Imagination》，他笑言沒有出碟的日子過着退休般的生活，全力去做「一生所愛」的事情──研究音樂：「我冇停止過，我係一路研究和弦，依家掌握100%點樣去運作，好處就係可以提升自己嘅音樂，加多好多想像唔到嘅顏色落去個音色度！」碟中以翻唱其經典舊作為主，歌曲均作重新編曲，另加一首全新歌曲《人間天堂》。

壓力大搞到生蛇

舊歌新唱難免會有所比較，不過LoLo坦言不擔心新編曲未能超越舊版：「一開始同唱片公司傾，我話我咁耐冇出碟，一出一定要好過舊時，第二，我係一定要做啲可以值得喺世上留低嘅音樂，所以一隻歌可能改咗好多次先合格！」

LoLo坦言這些年來未有停止創作，三年前曾為一套美國音樂劇作曲，不過素來對音樂要求極高的他卻因此飽受生蛇困擾：「因為要同美國嘅Composer去比，所以畀到我嘅壓力係非常大，我擔心個效果唔夠好，令我免疫系統低咗，就生蛇！」而隨着出來的作品得到大家的認同，壓力亦消除：「可以消除到嘅壓力係好嘅壓力，同埋耐唔耐畀番啲壓力自己，係提升自己好好嘅方法！」

未有引以為榮作品

縱然出自LoLo手的經典歌曲不少，但提到最引以為榮的作品，他卻說：「冇，未有！」又透露心中覺得好的作品需達到如音樂劇《Cats》的主題曲《Memory》的水準：「我仲未作到呢啲歌，仲差啲日子，即係你浸咗幾耐，研究咗音樂幾耐！」要創作更多的好歌，最重要是擁有一顆鬥心，LoLo便會找世上一百首認為最好的歌去比併：「我希望我作嘅歌可以喺呢一百隻入面，唔使超越，但都差唔多先出得街，即係會咁樣去逼自己去做得更好！」