鍾舒漫妹妹鍾舒祺跟家姐姊妹情深，她坦言最難忘兩姊妹在英國讀書「走天涯」，不怕外界把兩人比較！去年重返樂壇的她早年曾到台灣發展，但有段時間事業停滯不前，她表示全因自己不滿足！

開設時裝品牌的Sukie親自打造打歌服。

Sukie大晒長腿，又推出新歌，為樂壇注入新力量。

Sukie拍住家姐鍾舒漫，姊妹花孖住上。

歌手鍾舒祺（Sukie）於2009年到台灣發展，在選秀節目《超級偶像（第三屆）》勇奪第九名，本應一帆風順的她事業卻在2011年停滯不前，直至去年才與家姐鍾舒漫（Sherman）推出合唱歌，重返香港樂壇，最近推出歌曲《心嚎》的她坦言新歌唱出心聲：「講其實每個人都有權選擇自己條路點行，你選擇沉淪喺低潮定係企番起身繼續行？」選擇了後者的她更剖白：「我去台灣嗰陣都忙咗成三、四年，有段時期覺得辛苦咗咁耐，但點解仲會咁樣嘅？但嗰陣嘅思維其實係錯咗。」幸好後來得經理人把她從深淵拯救出來，亦靠信仰令她想通。

難忘英國走天涯

Sukie跟家姐感情好到不得了，她坦言家姐是她的精神食糧，亦難忘兩人在英國「走天涯」：「嗰陣我哋喺英國讀書，我哋讀Art要畫畫考大學，要拎住啲好重又大幅嘅畫喺成個英國係咁跑，成日蕩失路，電話又畀人偷咗，不過依家諗番都好搞笑。」姊妹情深的她亦不怕外界把兩人比較：「我見到咁耐都冇人可以將我哋兩個比較到。（視佢為學習對象？）某部分啦，例如洗衫、洗碗、換床單，奉旨家姐照顧我。」

開舖親製打歌服

原來除唱歌以外，擁有潮流觸覺的Sukie兩年前開設了時裝品牌：「係專責整衫，《SS14》嗰陣都有整過我同家姐套打歌服，不過冇諗過做連鎖店，因為暫時冇時間，想做好音樂先再擴充業務。」