睽違十八年再拍無綫劇集的錢小豪再度活躍於螢幕，曾任導演的他決定行喜劇路線，爭取「入屋」！心繫兒子的他又自爆被降服為「跟得爸爸」，更力撐兒子以「舞功」入行！

錢小豪選擇以喜劇重返公仔箱，望觀眾睇得開心。

形象強硬的錢小豪在兒子錢穎德前即化身溫柔Daddy。

動作演員錢小豪憑無綫劇集《潮拜武當》再度活躍電視界，他於九十年代拍畢劇集《俠義見青天》後，足足相隔十八年才再拍劇重返公仔箱。有武功底子的小豪一向力求多元發展，故他過往主力於內地做演員，甚至完成了不少演員的夢想──成為導演。

貪劇本夠輕鬆

正當大家以為他將退居幕後，小豪又從導演之位退下來，繼而化身《潮》劇中火爆正直的「包繼聰」。他坦言被劇本打動，加上渴望留港工作陪伴兒子，才毅然接拍：「我好鍾意套劇講求隨心而發同放低執着，講哲學但又好輕鬆。（行喜劇路線？）畀觀眾喺咁多年後再見我，感覺係開開心心！我由導演再做番演員更知道要咩，而且做演員收入同導演差唔多，拍完又可以陪個仔！」

樂做「跟得爸爸」

提到十二歲的兒子錢穎德，小豪竟被「冧爆」：「佢同我相反，好叻表達自己。我跟佢學番表達，佢係我老師。希望佢可以有爸爸陪去運動會同睇比賽。（跟得爸爸？）會捧場，如果我唔陪會冇話題。依家畀佢玩小型賽車，同佢有共同興趣後，就可以延長溝通。」問到功夫了得的小豪有否教兒子「練功」，甚至栽培他入行？他即指兒子具跳舞天分，更力撐入行：「佢鍾意跳舞多過打拳，我份人好開明，如果佢有呢個才華就唔好抹殺！如果壓抑佢咪仲加重自卑感，我會百分百支持佢！」