張晉出席《殺破狼II》慶功宴，對於新片票房大賣感到雀躍，身為動作演員的他雖然再添「戰績」，但笑言不介意為電影犧牲。而同場的蔡瀚億希望在續集中加入戰團，搵定師傅過幾招備戰！

張晉為拍新片弄得周身傷，更要忍痛睡覺，認真可憐！

大會為本月11日生日的鄭保瑞準備了五個壽包，寓意他成為五億票房導演。

Eddie認為與未婚妻朱慧敏需要時間磨合。

由動作影星吳京、Tony Jaa及張晉等主演的電影《殺破狼II》票房大賣，一班演員昨晚於銅鑼灣舉行慶功宴，太陽娛樂文化高層黃柏高（Paco）與導演鄭保瑞、演員張晉、盧惠光、蔡瀚億（BabyJohn）及彭懷安（Eddie）等亦有出席。Paco在活動上宣布《殺II》在港已達1,300萬票房佳績，內地票房更高達5億。對於電影得到影迷肯定，他表示計劃開拍續集，希望盡快公布消息。期間，大會更為本月11日生日的鄭保瑞準備了五個壽包，寓意他成為五億票房導演。

忍痛返歸老婆心痛

對於電影大賣，張晉笑說：「好開心，呢部係一套好男性化嘅戲，消費市場係畀女性主導，都吸引到咁多女性入場睇，真係唔容易，證明電影質素好。」為新片拍得一身傷的他，問到太太蔡少芬會否心痛？他說：「諗番拍嗰陣都幾痛，整傷腳返屋企，瞓都要忍住。（好番未？）差唔多，但又有新傷，拍《葉問3》整傷肋骨同手腕，不過唔講傷啦！好似炫耀咁，揀咗做動作演員就係咁。」問到《葉》片的進度？他說：「拍完喇！我都即刻剃晒啲鬚！（唔怕要補戲？）唔關我事，我離開咗劇組喇！」對於《殺II》將開拍續集，他亦十分支持：「睇佢哋搵唔搵我啦！要睇吓個角色，但當然會愈來愈好。」

搵師傅練功

BabyJohn對電影大賣亦感雀躍，更有興趣拍續集：「我都有同導演傾，佢話下集畀我繼續揸槍。（打埋一份？）都準備搵師傅學，喺片場見到張晉佢哋，先明白咩嘢叫做功夫，係需要時間去浸淫同經歷，唔係咁簡單。」而Eddie被問及與未婚妻朱慧敏的關係，他說：「佢早幾日喺英國返嚟，大家都有聯絡同見面，但唔係一齊生活。（依家嘅關係舒服？）我哋發現之前有好多問題，大家會坐低聽對方講，係需要時間磨合。」