任達華於父親節獲女兒任晴佳施冧功，加上主演新片票房報捷，雙囍臨門的他開心到「暫時連老婆都可以唔要」！身在上海的他更自度續集角色，誓要挑戰吳京及Tony Jaa，繼續以「打不死」形象強勢回歸！

任達華親自到湖邊釣魚，準備與愛女撐枱腳。

身在上海拍戲的任達華，抽空帶囡囡周圍去玩。

《殺破狼II》票房氣勢如虹，任達華當然贊成拍續集。

張晉和吳京在片中打到飛起。

任達華近年有女萬事足，每次提起10歲大的任晴佳都禁不住勁冧。談起父親節，身在上海的他說：「佢開始放暑假，我又要喺度拍戲，所以帶埋佢上嚟，大家玩兩日先。尋晚佢攬住我瞓，搞到我意亂情迷，真係暫時連老婆都可以唔要。」身為廿四孝老竇的任達華，昨晨親自到湖邊垂釣，帶幾條海上鮮返家與囡囡撐枱腳：「佢有新鮮魚食好開心，我都好開心，因為佢送盒禮物畀我，喺上面畫咗好多公仔，真係心思盡花呀！」

內地票房破3億人仔

至於他與吳京及Tony Jaa等主演的新片《殺破狼II》票房氣勢如虹，在港累積票房逾500萬，內地上映4天更突破3億人民幣，台前幕後認真飲得杯落！劇組已鐵定本月26日晚在港舉行慶功宴，但因要拍戲，任達華未能返港參與，但對開拍第3集則舉腳贊成：「我覺得第3集自己要演一個退休警察，繼續打生打死，會同導演鄭保瑞傾吓。佢一直好聽我嘅意見，好似今次用攪拌機碎手嗰幕，都係我諗出嚟，而佢又覺得OK。（幾時開工？）咁多嘢要準備，我覺得最快都兩年後啦！」

張晉遺憾冇囡陪過節

該片導演鄭保瑞透露《殺II》拍攝過程經歷了「吳京受傷坐輪椅結婚」及「張晉打到放血」，今次成績絕對得來不易，令他心存感激。而張晉表示所有付出的血汗都已值回票價，但因要開工關係，今年他未能與兩位愛女慶祝父親節，難免有點遺憾！

文：影視組