今個父親節對三位圈中父親胡諾言、林盛斌（Bob）及甄子丹來說，可謂十分難忘！胡仔細女於家中跌爆眉骨險破相，令身在內地的他非常心痛；舉家出遊的阿Bob，駕車途中發生交通意外要賠償；而負傷在身的甄子丹昨日拍戲時再添一道疤痕，認真慘情！

阿Bob載着家人出遊，不料途中發生交通意外。

昨日父親節吸引不少圈中人於網上公開向父親表達愛意，不過胡諾言、阿Bob及甄子丹三位父親卻有不同感受。身在開平為劇集《公公出宮》拍外景的胡諾言，細女芷悠日前疑於客廳梯級差錯腳撼爆眉骨，嚇得家人急急將她送院，經醫生診斷後發現傷口頗深，建議轉介整形科醫生。胡仔獲悉愛女「出事」後非常緊張，更想立即返港，他說：「好擔心細妹，佢咁細個，但太太阻止我，話我返去都幫唔到咩，咁就等佢Settle件事，我就一直等電話告知細妹情況。」

傷口深至見骨

陳琪表示芷悠的手術原定須時15分鐘，結果個多小時才完成，她說：「醫生話芷悠傷口一吋長，又深到見骨，所以手術要由骨膜開始補，之後肌肉、脂肪到皮膚逐層幫佢補，已經數唔到縫咗幾多針，真係喺手術房出面驚到喊。」她又指芷悠向來貪靚，手術翌日照鏡時因未能接受而爆喊：「嗰次之後唔肯再照鏡，我唔想老公頻撲返嚟，所以每日影個女最新情況畀佢睇。」

撞車破財擋災

另一方面，三女之父的阿Bob昨日駕車載全家到主題公園慶祝，途中與一名律師開的車發生輕微碰撞，最終賠錢了事，阿Bob說：「平日都唔揸嗰條路，意外後有報警，但最後自己解決，冇咩大問題，大家撞到大家泵把，人哋新車落地一個月，我大女就嚇到喊，驚我畀人打同鬧，今次當破財擋災，下次會提醒自己小心啲！」其後，阿Bob更將與車主的合照上載到Instagram。

此外，在上海拍攝電影《葉問3》的子丹，昨日上載一張以毛巾按着受傷位置的照片，難得受傷仍大晒勝利手勢。而他亦趁節日上載兩張父親的照片，並留言：「老爸，您總是用最平淡、最樸素的方式去表達您的愛，但您的愛卻足夠我享用一輩子。祝天下爸爸父親節快樂！」