美國失婚金像影后桂莉芙白德露（Gwyneth Paltrow）傳與拍拖一年的美劇監製男友Brad Falchuk玩完！有指桂莉芙為人麻煩執着，堅持要健康飲食樣樣嘢管住晒，搞到愛啃漢堡包的Brad冇啖好食，兩人為此日嘈夜嘈，關係生變感情凍過水！

美國雜誌《Life & Style》報道42歲桂莉芙白德露與男友Brad Falchuk感情亮紅燈，報道引述二人朋友爆料指：「他們現時關係出現問題，桂莉芙覺得要同Brad分開。兩人最初好好的，大家都認真，感情發展一日千里，但最近經常嗌交，令到桂莉芙非常冇癮兼厭倦！」

性格唔夾

朋友卻指問題出在桂莉芙身上，因她向來注重健康生活，長期堅持只吃有機健康食物，但Brad則對生活不拘小節，二人性格分別甚大！桂莉芙執着甚麼都要話晒事，偏偏Brad「唔跟佢嗰套」，結果兩人常常為了芝麻綠豆小事吵大鑊，尤其在食物方面，Brad有時只想出去吃個漢堡包，但桂莉芙恍似發癲般嘈喧巴閉。

避談感情

報道指Brad現時專心工作不提感情事，手上有幾個電視劇要搞，似乎與桂莉芙處於冷戰。44歲的Brad是人氣美劇《歡樂合唱團》（Glee）監製，去年中傳出同桂莉芙撻着，當時桂莉芙剛與Coldplay主音丈夫Chris Martin分居數個月，有意把新戀情保密，今年4月初她一改低調作風，孖住Brad出席「鐵甲奇俠」羅拔唐尼（Robert Downey Jr.）50歲生日派對晒恩愛，誰知咁快就傳出玩完！