眨吓眼《東網巨星》App特備節目《我愛發哥》來到最後一集,壓軸嘉賓是樂壇天后容祖兒!祖兒趁這大好機會邀請偶像周潤發行山,豈料發哥再出招,笑言上鳳凰山要過夜,並會留低她與男友劉浩龍(師兄)在山上,即嚇得祖兒O晒嘴!而發哥更笑言未知何時再上節目與大家見面,看來大家都耐心等等喇!

祖兒大讚發哥不但靚仔,而且心地好又親切,男神魅力沒法擋!

發哥一提師兄,祖兒即忍不住甜笑!

祖兒:我愛發哥……夠靚仔,鍾意發哥心地好,又親切,有求必應!

發哥:我夠鍾意你啦!喂!最近唔知點解,唔記得邊度見到張相,見唔到你個樣,只係見到你背脊,你知啦!啲蝙蝠瞓嘅時候係倒轉嘅,你背脊就好似倒轉嘅蝙蝠,嘩!幾犀利呀!睇唔到你個樣,但啲人見到話係你,我話唔係吓話?真係好堅,我都要跟你學習,你搵邊個教練?(祖兒:我邊度有呀?)

祖兒:發哥,你幾時同我行山呀?我都好想同你行鳳凰山,睇日出再影相,跟住再食早餐,約定你!

發哥:姐姐,上鳳凰山要過夜喎!(祖兒:吓?係咩?鳳凰山要過夜咩?)嗰度地方得丁屎咁大嘅屋仔喎!我哋兩條友落去,又唔夠我哋瞓喎!但如果你話,我同你上去又唔好喇!同埋龍哥逼埋落去又逼到爆,咁又梗係唔好,鳳凰山呢,我帶你兩個去一次,六點幾上到去之後我就走先,你兩個繼續睇日出,我就唔喇!因為我怕,驚黑,所以通常唔喺啲山度過夜,留番你同龍哥去喇吓!

祖兒得知跟發哥行山要過夜,個心當堂十五十六,又想去又驚發嫂鬧,她說:「其實我真係冇諗過鳳凰山得咁細地方同要過夜,但係如果可以同發哥過夜呢……我都驚發嫂會鬧,都係唔好喇!唔敢唔敢唔敢……」