最近投資「雞生意」的李雨陽雖然覺得做老闆壓力大，但他暫時仍想專注做生意，不會分心幕前。隨着歲月增長，他亦渴望成家立室，希望盡快遇到對的人！

升呢老闆做生意令李雨陽眼界大開！

李雨陽希望找到人生中的Miss. Right，盡快組織家庭。

最近與趙頌茹合作拍攝有關警察題材新劇的李雨陽，除了幕前的工作，他亦投資「做雞」：「呢門冷門生意令我依家同人傾偈時都多咗一個打破隔膜嘅方式，有啲街坊好搞笑咁問我『你係都做鴨啦！點會做雞呀？』我就解釋其實我係做零售批發同代理，畀到我一個幽默啲嘅方法去開始大家嘅談話！」

一切由零開始

李雨陽又感謝當初「拉他一把」的叔叔：「當初用嘅錢唔多，呢位Uncle好多嘢都喺背後支持我。」他坦言最大的困難是由零開始：「我未做過生意，好多文字上嘅嘢都未做過，好似要接觸超市傾擺賣要有計劃書，發覺自己完全冇咁嘅知識，就連報價單嘅格式都唔知，要周圍去問人拎Sample睇。」他又指做演員與做生意給他的滿足感相差甚遠，壓力亦差天共地：「當你要Sell一個集團去用你啲雞，要不停去諗做嘅嘢足唔足夠去吸引佢哋，當然拍場戲都需要時間準備，但係兩樣嘢好大分別，自己做老闆同打份工真係好唔同！」

李雨陽又透露會「暫別」幕前，專心做生意直至完全上軌道：「初頭盤生意未去到依家規模嘅時候，我覺得仲應付得嚟，但嚟緊半年至九個月可能未必兼顧到兩邊，如果所有嘢發展順利，都想有時間拍番嘢，遇到好劇本又搵到人幫我打理公司就冇問題！」

渴望成家立室

生意愈做愈大，成家立室是他未來要達成的目標：「一路以嚟都好想，但係個個都知做演員收入唔穩定，呢盤生意又未係發展到好蓬勃，所以都係慢慢嚟啦！首先你要搵到個啱嘅另一半，亦要個啱嘅Timing！搵另一半嘅話，年紀開始大，唔會再好似啲小朋友咁追求轟烈嘅愛情，大家相處得舒服就足夠，就算對方唔喺身邊，諗起佢都會會心微笑，呢種平淡嘅關係就夠晒！」