歌手J.Arie（雷琛瑜）最近踩入時裝界開設二手古着網店，「升呢」做老闆娘的她當然要落足心機經營，除親力親為搜羅獨家靚衫之外，為盡快開設實體舖及一圓「上車」夢，她不惜出口術老闆黃柏高（Paco）加人工！

J.Arie出口術叫老闆黃柏高加人工，盡快開設實體舖！

「升呢」做老闆娘的J.Arie密密儲錢一圓置業夢。

黃柏高

娛樂圈不少藝人「百足咁多爪」，除專注演藝事業外，更會投資小生意。最近J.Arie成功撈埋時裝界，與友人合資網上古着店，原來她自小已鍾情復古衣物：「就算唔着上身，我都鍾意搜羅復古衫褲，因為我好明白買嗰個人嘅喜悅！我啲衫唔係好貴，見到人買到會好開心，有客人大讚好靚、好抵。」

買衫一腳踢

榮升老闆娘的J.Arie對網店一絲不苟，由搵衫、包裝到宣傳，全部一手包辦：「好多人第一印象係睇包裝，影相要影得靚，所有嘢我都自己一腳踢！有時會去外國古着店買衫，另外亦都同香港啲零售批發有聯繫，好多衫都係獨一無二，係精品嚟！依家生意唔錯，開始想請人幫手送貨交收。」

落力搵錢「上車」

滿腹事業大計的J.Arie，下一步希望拓展「時裝王國」版圖，以開實體店為目標：「等網上生意好啲，我都想開實體舖，但香港舖租實在太貴。依家儲緊錢買樓先，慢慢努力，一出糧就儲起啲，慳啲使嘛！」問到可會要求老闆Paco加人工？她笑說：「好似今年會加人工喎！加少少啦，幫補吓啦！畢竟屋企照顧咗我同細佬咁多年，都想靠自己雙手去照顧番屋企人。」