陳豪早前偕羅仲謙（謙仔）拍新劇，身形清減不少的陳豪自詡「減肥專家」，以「懶人減肥法」成功由加大碼減至中碼，就連太太陳茵媺亦大讚他Fit到爆！

成功由加大碼減至中碼的陳豪，幾時騷腹肌畀我哋睇成果先！

Aimee盛讚老公陳豪Fit到爆。

謙仔（右）向總編陳豪遞辭職信，卻被對方即場撕碎兼訓話！

無綫藝人陳豪、羅仲謙及泰臣日前為新劇《潮流教主》拍外景，劇情講述飾演男模的謙仔到潮流雜誌社打工，遇上「人見人驚」的總編陳豪，謙仔原本打算遞辭職信，豈料當場被陳豪撕碎兼訓話，令謙仔嬲到爆！

Aimee教着衫

早前於《水髮胭脂》身形暴脹的陳豪，拍攝時身穿西裝戴墨鏡的他，明顯清減不少。原來他接到劇本後立即收身，自稱「減肥專家」的他以「懶人減肥法」由加大碼（XL）減至近中碼（M），他更獲太太陳茵媺（Aimee）支持，陳豪笑說：「我乜都唔使做，只係喺食方面調節，一啲都唔辛苦！Aimee叫我減咗好耐，雖然冇嫌我肥，但叫我瘦多啲。（依家有腹肌？）OK啦！有幾舊見吓人咁囉！（老婆有讚？）係呀！」《潮》劇有靚衫配靚景，談及私下的服飾配搭技巧時，他表示平日會問Aimee意見：「佢Fashion Sense強啲、Taste好啲，我冇咁叻！」

楊怡冇呷醋

而謙仔則透露稍後將拍愛情電影及劇集，並預告將要騷身材，故目前開始Keep Fit！一講到拍愛情片，少不免有親熱鏡頭，問到另一半會否呷醋？跟楊怡戀情日漸明朗化的他笑說：「佢應該恭喜我又有搵錢機會！（賺好多？）總算有少少收穫，之後打開更大市場。」他們近日屢被拍得睇樓，問到密密搵銀的他是否為買樓？謙仔說：「我係想買樓！但依家買樓係抽籤，所以冇運都買唔到，自己想用嚟投資，可惜冇乜運！（要成家立室都要快？）隨緣啦！」