歌手JW約滿舊公司後積極操弗，她試過前老闆黎明的「靜坐減肥法」後大呻未見成效，故決定進行地獄式健身！情迷肌肉男的JW更希望與運動型男生一齊操弗，打造最強S形Body迎戰，而她減磅後即惹來狂蜂浪蝶。

屬有料之人的JW豪言無懼上圍降Cup，未知一眾正在減肥的女生情何以堪呢？

正等待事業新發展的JW，近期流連Gym Room落力操弗！

試過黎明的「靜坐減肥法」後，相信JW深明「減肥需苦幹」的道理吧！

（設計對白）

減肥瘦身從來都是女人的終身事業！歌手JW人生最高「脹」期時重達117磅，三年前開始加入做Gym大軍，極速踢走17磅脂肪：「三年前決定唔可以再放縱，以我高度嚟講，嗰時有117磅真係好犀利，依家減到100磅左右，但我目標唔係睇磅數，反而係睇番成個身形。」

瘦身唔降Cup

提到前老闆黎明曾爆出獨門秘方「靜坐減肥法」，JW即大呻：「呢招我唔Work，我坐喺屋企度都減唔到嘅，做Gym對我比較有用！」很多女星都擔心減肥會連人帶「胸」縮水，惟得天獨厚的JW卻冇有怕：「好好彩！我瘦嗰時唔會咁快瘦胸，瘦面先，之後肚腩、手臂，但我依家仲未滿意，想腰同手臂練到更加結實！」

擇偶條件：肥過我

成功塑造出弗爆身形的JW自然吸引不少男士追求，她承認收身後異性緣急升：「覺得有分別，肥嗰時同男仔好易會變咗兄弟。（多人追？）都會有，但依家事業為重啦！」問到擇偶條件？她自爆鍾情肌肉男：「最好運動型，可以同我一齊做運動，有肌肉仲好啲，唔可以瘦過我，我會好大壓力。」整裝待發的JW放風表示正與幾間公司斟洽：「再開始想有副Fit嘅Body去迎接新發展，好開心依家完咗約有幾間公司搵我，根據經驗要小心考慮清楚，唔想咁快下決定。」