第二十三集《我愛發哥》昨日在《東網巨星》App播出，影壇新貴文詠珊（Janice Man）向男神周潤發請教親民及保養妙法，發哥再顯風趣本色，搞笑提議JM改英文名做「親文」及搽砒霜養顏！

發哥教路，只要滴一滴砒霜喺水度再攞嚟搽面，就可以保持青春……講吓笑啫！最緊要健康！

Janice Man大讚節目得意，好似同發哥Face-to-Face傾偈咁！

JM：我好鍾意發哥親民、獨特作風，唔理會其他人目光，好有獨特個性，好值得我哋後輩學習。

發哥：喂！咁你改吓個英文名啦！改英文名就得喇！你姓文o架嘛！改做「Chan Man」、「Chan Man」！咪親民囉！（JM：變咗陳曼喎咁！）改咗個英文名，以後你就係「親民」囉！人哋叫你「文親」？唔係！你話我係「親民」，「Chan Man」！

JM：點解發哥可以Keep得咁年輕又咁英俊呢？點解可以Keep得咁好，有咩獨特秘方呢？

街邊方法靠唔住

發哥：呢個有啲秘訣，但唔好立亂學，我聽啲古方咋！少少砒霜，砒霜有毒，開幾萬分之一，開一公升嘅水，滴萬分之一嘅砒霜，（JM：用砒霜開水呀？）係咁意，即係你見到啲噴劑嗰點劑落水度，唔係要嚟飲，係要嚟搽！（JM：搽砒霜？）或者搵少少防腐劑，一萬比一，開稀佢，係咁易抹一抹，但我就冇用，因為靠唔住，街邊人講嘢我唔信。（JM：哈！講完但你唔用嘅！）最緊要你做多啲運動，食嘢要健康，唔好食咁多垃圾嘢！就係咁簡單。」

JM：唔知我有冇機會同你合作呢？你都係我偶像嚟！

發哥：呢你就客氣啦！點會冇機會呢！你只要同啲製作公司講，有發哥嘅我唔收錢都嚟，咁咪得囉！

唔收錢跪求合作

JM看發哥的解答時一直笑不攏嘴，心情勁High！她大讚發哥超級風趣：「係呀！我唔收錢都嚟，冇諗過發哥你係咁幽默，啱啱同發哥傾偈，有呢個交流互動，我非常之興奮，因為我覺得感覺好似你喺我隔籬咁，有呢個交流，我覺得呢個節目非常得意，希望有一日真係有機會同發哥你合作，有對手戲啦！我會覺得好興奮同榮幸。」