自言對女神陳凱琳有好感的鄭嘉穎，現時全心全意與女神努力發展，為抱得美人歸，近日又豪擲逾450萬元，購入法拉利458 Speciale超級辣跑！由於跑車起步時速由0至100公里只需僅僅三秒，日前嘉穎駕駛新車現身跑馬地準備做「柴可夫」會佳人時，快到連車尾燈都見唔到！

鄭嘉穎被《好報》獨家踢爆與陳凱琳因拍劇而擦出愛火花。

鄭嘉穎特意申請同以「458」字尾的車牌配襯458 Speciale超級辣跑。

城中筍盤鄭嘉穎向來對戀情十分口密，不過自被《好報》獨家踢爆與前港姐陳凱琳（Grace）因合拍劇集《殭》擦出愛火花後，一改平時低調作風，放風希望外界給予空間，又不惜搬竇兼買車，爭取時間與女神發展！

早前嘉穎被本報獨家踢爆以黃金寶馬接載Grace到金鐘撐枱腳，原來他未騷出底牌，秘密豪擲逾450萬元買入火紅色法拉利458 Speciale辣跑，車速能在3秒內破100km/h，他又特意申請同以「458」字尾的車牌襯到絕！以公司名義登記購入辣跑的嘉穎，新車落地4個月，即急不及待會佳人。與Grace在金鐘撐枱腳翌日晚上十時許，他獨自揸車由大坑寓所前往跑馬地，當記者打算「野生捕獲」時，一心會「情人」的他，即踩行油門絕塵而去，辣跑一出，連車尾燈都望不到！

「最緊要係佢開心」

其後本報致電Grace，問是否已成嘉穎新戰車的座上客？她說：「大部分男仔都鍾意車，我知佢買咗呢架車，佢咁努力賺錢，當買份禮物畀自己好正常，最緊要係佢開心！」問到坐嘉穎戰車感覺如何？她九唔搭八地說：「我唔熟車，不過佢好鍾意車，佢都好樂意載朋友！」問到會否向嘉穎借戰車揸兩轉？她說：「我有車牌，但香港啲路唔熟，應該唔會喇！」

老友讚香車美人

對於嘉穎買新車，好友唐詩詠說：「我哋一早知佢買車，佢有同我哋講，佢仲話得閒車我哋兜番轉！咁靚車配美人梗係好啦！」林子善則認為要順其自然。至於Grace好友洪永城則說：「唔知佢哋係咪想結婚喎，Grace都係啱啱讀完書。」

3秒可撇甩記者

鄭嘉穎新買的法拉利價值逾450萬港元，引擎經過車廠改良後，可於3秒內衝破100km/h！

型號：法拉利458 Speciale雙門雙座位跑車

引擎：V8

容積：4,497c.c.

最大馬力：605hp/9,000rpm

賣點：3秒內衝破100km/h