第22集《我愛發哥》昨日在《東網巨星》App播出，歌手兼演員任賢齊與神級影帝周潤發隔空交流，發哥笑住叫小齊帶他飛轉電單車，小齊則笑言正努力賺錢，準備邀請發哥演出他下套執導電影。

發哥叫小齊帶佢去鍊車，唔畀發嫂知！

小齊想邀發哥做男主角，呢個配搭夠新鮮！

小齊：大家都知發哥係我偶像，我好鍾意發哥同佢好多戲入面嘅角色，仲有佢個人好Nice！

發哥：喂！幾時去騎電單車搵埋我呀？但係唔好通知我老婆，靜靜哋同我鍊一轉！你睇住我呀！

小齊：有時我喺街度，見到發哥周圍行好自在，好多人都想同發哥影相，但講真如果幾百人圍住你都要影，咁嗰時點解決呢？因為我都有遇到呢個問題。

發哥：呢個問題，最好就係影影影影影影，喺你覺得時間許可之內盡量影，如果超過你時間上限，譬如你預五分鐘、十分鐘你都可以忍受到，但影影吓不可控制喇！唯一辦法打999啦！要警車護送你，一係呢話我老竇老母喺餐廳等緊我，又或者佢哋唔舒服要睇醫生，大家一定原諒你，仲有一樣，用手機嚟張大合照，佢哋自己WhatsApp番，分番張相咪得！

小齊：仲有，我希望自己做導演嘅戲，首映嘅時候可以邀請發哥嚟睇，你得唔得閒呢？

發哥：你幾時首映呀？套戲叫咩名？恭喜你做咗導演！點解你做導演都唔搵我呀？真係呀！係咁！

新片最佳人選

獲得發哥回覆，自認Fans的小齊High爆狂讚偶像，更表示下套戲想找發哥做男主角：「多謝發哥！佢所有嘅方法同處理方式都可以滿足大家，令大家好開心好開心！我拍套戲叫《我的澎湖灣》，如果有機會我呢套戲賣得好，我賺多啲錢，應該就可以請到發哥做我哋嘅主角喇！下一套戲係江湖片，我要向《英雄本色》致敬，我要拍我嘅傷心太平洋，發哥可唔可以做我大佬？」