無綫經典劇《他來自江湖》前晚重播，連場笑料再次掀起全城熱話！一眾參與演員昨日以電話受訪表達興奮之情，更各自大爆拍劇時的搞笑趣聞！

吳孟達（左）、周星馳（右）

吳孟達為「金水」加戲

吳孟達自爆當年主動為劇中兒子「金水」周星馳爭取加戲：「當年同星仔會將個人構思放落套劇，記得萬梓良拍咗一幕用花灑淋醒張鳳妮嘅戲，我同星仔就重演咗個搞笑版，但當時星仔未成名唔敢講，所以由我向監製引薦加呢場戲。」

羅蘭笑爆瞓地講電話

劇中扮演「花雞乸」的羅蘭，指拍攝過程好玩又過癮，更大爆周星馳常常「爆肚」。最難忘他拍講手提電話的戲：「見到佢就覺得好好笑，場戲話佢手機收唔清，佢行到窗邊瞓喺地度聽，當時心諗『乜玩到咁誇！』（盼再合作？）有機會梗係好。」

「鋼牙」毛舜筠做自己

毛舜筠笑言於劇中化身鋼牙妹完全「零難度」，皆因當時她本身亦有箍牙：「拍劇前真係箍緊牙，所以劇中做鋼牙妹好容易適應！（當時唔擔心醜化形象？）從來唔擔心！」