秋生自爆搵周星馳教戲
周星馳主演神劇《他來自江湖》接「丁蟹」棒昨日凌晨重播，收視報捷吸引逾36萬人深夜熱捧「何鑫淼」，其昔日拍檔梅小惠更大爆拍攝秘聞，自爆拍完被扑頭戲後「血流披面」收工，結果冇的士肯載，而劇中奸角黃秋生，則自爆當年曾搵周星馳教他演戲！
黃秋生（左）與周星馳當年由公仔箱合作到大銀幕。
監製劉家豪
無綫深夜時段重播經典劇《大時代》後，接「丁蟹」棒的是萬梓良與周星馳主演的1989年劇集《他來自江湖》，身為無厘頭元祖的周星馳，於劇集《蓋世豪俠》及《他》劇中均笑料百出，經典一幕接一幕，於昨日凌晨重播的第一集中，其風頭直蓋另一男主角萬梓良。重播首集平均收視4.78點，最高收視則高達5.64點，有約36萬4千人觀看，其中兩個場口更惹起網友熱議。
飾演的士司機的周星馳，收工前遇麻煩大嬸捧着多隻雞仔上車，又「撻朵」兼用法律威脅他不可拒載，到達目的地時周星馳以其人之道還治其身，要大嬸為每隻雞仔付2元的附加費（現時附加費已調至5元），激到大嬸紮紮跳！有忠實「星迷」更聲稱發現有對白被Cut，是講述周星馳責罵無知婦人時：「係咪想我炳你鑊甘，甘都冇咁甘？死笨橙！」不過昨日在無綫官網則有「原汁原味」版本。
「滿頭血」趕收工
至於講到全劇另一經典必睇位，是結局中自稱「情場鬼見愁」的周星馳與「甩頭芝」梅小惠被脅持時，小惠陰差陽錯被他扑到頭破血流，當時周星馳一句「冇人要你我要你」對白令人印象深刻。梅小惠昨日接受本報電話訪問，大爆當年拍扑頭戲的秘聞：「拍完已經好夜，工作人員收晒工，冇得落妝，我成頭血咁由清水灣電視城行出去截的士，仲要着住白色衫，啲的士都唔肯載我。」她又讚周星馳有感染力。對於早前邵仲衡因《大時代》翻Hit而勁賺，梅小惠表示歡迎找她工作：「個價就要畀多啲啦！我會全數捐出，用嚟做善事。」
於《他》劇飾奸角「Johnson」的黃秋生，自爆家中早已收藏《他》的光碟，可隨時重溫。他憶述當年被萬梓良怒搣「拜拜肉」的戲，笑言當年抵不住痛楚請求對方放輕力度，豈料萬梓良即除衫晒肌，露出因拍攝而造成的瘀痕，令當時作為後輩的秋生當場語塞。秋生又表示其後曾向周星馳請教演出喜劇的方法，喜獲對方大方分享，獲益不少。
劉家豪讚主動度橋
《他》劇監製劉家豪昨日接受電話訪問時表示未有看重播，他笑說：「都識背啦，唔使睇！」他表示此劇卡士勁，是1989年的台慶劇，又讚周星馳好正：「呢套劇同《蓋世豪俠》，周星馳同吳孟達都好成功！（周星馳會唔會爆肚加嘢？）唔會，佢會諗好多嘢，會同我傾咗先！佢諗嘅十樣有五、六樣都成事，好欣賞佢！」問到會否希望收視超越《大時代》，他只望做好口碑，至於會否開拍電影版，他笑說：「根本冇可能維持到個卡士！冇周星馳就唔係《他來自江湖》啦！」
