第21集《我愛發哥》昨日在《東網巨星》App播出，寫真女王周秀娜好奇神級偶像周潤發的自拍神技，發哥推介只此一家的「發記自拍神器」，周秀娜即爭住要，非常搞笑！

周秀娜想要發記自拍神器，但看來得發嫂可任意使用！

發哥的手夠長又柔軟，自拍嗰時想點擺甫都得喇！

周秀娜：我愛發哥型英帥靚正！我鍾意發哥佢會去買餸，好親民，同埋會搭港鐵！

發哥：喂！香港廣大市民都好鍾意搭港鐵，個個都去買餸喎！你都鍾意晒喎娜姐！

周秀娜：點同呢？邊有咁高呢？我想問發哥平日最叻整咩食？知你會去街市買餸，會唔會煮嘢食？

發哥：舊時就會，周太霸佔個廚房之後，將我趕出廚房，我依家十指不沾陽春水，唔會煮喇！出去買番嚟食就算喇！因為個廚房畀人霸咗，陰功！

周秀娜：咁呀？我淨係睇住你喺廚房都OK喇！或者我哋就咁坐喺度都OK！我知你好高，手好長，但都想知你有冇自拍神器？

發哥：呢個自拍神器唔使喎！佢唔硬，好夠柔軟，角度畀支棍更好，因為你一隊到咁遠嘅時候，你前面好空呀！我呢個自拍神器呢又挑得，又Shift得，正好多！不過冇得賣，得一支！呀！有兩支，左一支右一支，冇咩人好似我隻手咁長，得兩支，註冊咗，發記自拍神器。

「娜娜淋」學煮嘢

得知發哥不入廚房，周秀娜即笑言會增進廚藝，一於炮製潮州菜及蛋糕冧偶像，她說：「多謝發哥！我好開心，你抽中咗我！你唔煮嘢食唔緊要，你唔掂洋葱水（陽春水），由今日開始，我就去學煮嘢食，呢排我學識咗整蛋糕，如果你想煮中菜，我都可以煮，又或者潮州菜，因為我係潮州人！我覺得你個自拍神器幾好，但我都想要一個註冊咗嘅發記自拍神器，因為我隻手冇你咁長！」