天后容祖兒（Joey）與李克勤昨日舉行演唱會記者會，並即場進行結盟儀式，有福同享！演唱會反應熱烈，克勤坦言預訂了數以千計的門票但「一鋪清袋」，希望朋友別再向他下手，而「來者不拒」的Joey亦被負責訂票的助手請求收手！

祖兒與克勤結盟做兄弟，承諾「同工同酬，不分你我」。

克勤與祖兒乘坐直升機到場，霸氣盡現！

容祖兒與李克勤昨日為《容祖兒李克勤演唱會》舉行記者會，兩人乘坐直升機到達尖沙咀會場，盡顯氣派！他們又即場舉行「兄弟」結盟儀式，承諾「由依家到演唱會期間結為『兄弟』，無論唱歌跳舞定上台講都同工同酬，不分你我！」並做出結盟手勢，將兩人手掌印有的「J」和「H」拼合，兩間唱片公司的代表亦簽名落實結盟。適逢Joey今日35歲生日，大會特意準備蛋糕為她慶祝，英皇高層吳雨在她許願時抵死地說：「祝師兄（劉浩龍）師姐好！」Joey聞言立即怒睥對方！

勸Fans有飛趁早買

Joey與克勤受訪時明言結盟只限於演唱會，對於有南亞裔人士已排隊準備今日公開發售時購票，克勤說：「真係想買飛咪等加場，因為就算加都加得少！（欠好多飛債？）尋晚食餐飯都冇100張，我未收Order前已經訂數以千計飛，但一次過冇晒，所以咪再搵我！」Joey則笑稱門票交由助手負責，助手隨即請求她不要「來者不拒」！問到可會考慮加開日場？Joey表示試過一次但很疲倦，克勤則說：「我同校長（譚詠麟）25歲加23歲試過兩日做四場，不過都係睇吓點先啦！」

Joey「縮水」遷就拍檔

問到服裝上會否遷就克勤身高，棄穿高踭鞋？Joey說：「我個頭會勁大，唔唔得，但可以考慮唔咁高！」而問到生日願望是否希望如吳雨所言「祝師兄師姐好」？壽星女Joey賣關子說：「你跟到我，我就講！」提到男友被傳因「污糟論」遭擱置出碟，她表示下次再回應。