陳婉衡（Alycia）由無綫新一代「咪神」進化成「女版蜘蛛俠」，苦練空中絲帶舞及空中呼拉圈，挑戰反地心吸力！雖然不時會「飛天落地」見頭暈，但為了練出馬甲線，她不惜長期過「空中飛人」生活。

「女版蜘蛛俠」陳婉衡苦練空中絲帶舞及空中呼拉圈，動作優美似足仙女下凡。

每次「升空」前，陳婉衡都會壓腿拉筋做足熱身。

身穿低胸裝的陳婉衡於節目盡晒本錢，成為新一代「咪神」。

Cradle空中絲帶舞的基本動作，在絲帶上以右腳作綁腿，左腳則向前伸直作支撐，並將雙手打開。

Half Star空中絲帶舞的中難度動作，靠腰部及右腳綁實絲帶支撐全身，右手再捉實絲帶，左手放開，形態像呈半狀的星星。

Man in the Moon空中呼拉圈的入門動作之一，坐上呼拉圈後，背靠圈的其中一邊，左腳向下成90度，右腳向上伸直，再將雙手打開，十足一個坐在月亮上的人。

Gazelle Split空中呼拉圈的中級動作，坐在呼拉圈上將雙腿大字形打開，上半身向背倒轉，張開一隻手，另一隻則抓緊圈邊。

無綫主播Alycia早前在旅遊節目中，憑吸睛度極高的「E Cup」導彈身材，成功奠定新一代「咪神」地位！在陸地上坐擁「最強胸器」的她，於空中同樣訓練出最強「空」器，皆因她最近成功挑戰兩項高難度運動－空中絲帶舞及空中呼拉圈！

在加拿大練開鋼管舞的Alycia，回流後決定繼續向高空發展：「返到香港就搵間學校學鋼管舞，咁啱學校有得學埋絲帶舞同呼拉圈，睇過馬戲團覺得絲帶舞好靚，就鍾意咗好想學。」在初學階段時，她因為天生缺乏運動細胞而感到相當吃力，惟有靠努力搭夠：「我本身係零肌肉，初初冇力，好多動作都做唔到！所以除咗上堂之外，我喺屋企都要勤力，做吓Sit-up、舉吓啞鈴，增強自己啲肌肉，等自己力量強啲！」

擦損拗柴係常識

日子有功的Alycia已經可以在半空做出各種優美動作，十足仙女下凡！美麗背後，原來她付出了不少血與淚：「成日都會整親，尤其係呼拉圈好硬，成日同皮膚有摩擦，加上對腳係個『災難現場』，成日都會瘀同擦損。玩絲帶舞就會整到腳背瘀晒，有時條帶會勒到大髀都瘀埋！」數到傷得最嚴重的一次，Alycia透露練習絲帶舞時曾因綁腿動作稍有失誤，最終不慎拗柴。

凌空倒吊轉到嘔

空中絲帶舞及空中呼拉圈不乏一些最考功力的倒吊動作，Alycia自小體質容易見暈，故練習時經常暈陀陀：「我本身搭船都會暈船浪，好多動作可以一路轉一路做，其實係好靚，但我就會好暈！初初做完成個人會行唔直，問老師有冇方法可以解決，可唔可以食暈浪丸？但食完暈浪丸會眼瞓，所以唯一方法就係衝破自己障礙，轉多啲。依家比以前進步咗啲，都會暈嘅，但至少唔會有嘔嘅感覺！」

冇仔埋身Dry爆

苦練兩種運動一年多後，Alycia自覺身材變得實淨，而且成功練出「老鼠仔」：「感覺到自己有老鼠仔，腹肌位開始硬，覺得好有成功感，要繼續努力，夏天就可以着泳衣！依家仲未夠Fit，我想練到馬甲線，仲差少少，感覺到佢好努力想出嚟！」身形愈來愈Fit，相信會令身邊異性流晒口水，但Alycia卻大呻冇男仔埋身：「冇呀！有冇介紹呀？因為呢種運動十個有九個女仔，更加唔會識到，依家冇人追，好Dry！」

公眾表演驚出醜

Alycia每次「升空」前都會做足熱身，靠壓腿拉筋增加柔軟度，以免練習空中絲帶舞及呼拉圈時受傷。經過一年多的努力後，她終學有所成，將與跳舞學校的同學公開表演空中絲帶舞。問到最近忙於積極排練的她可會緊張？她說：「依家仲有時間，未識緊張，啲人以為我好冷靜，其實我臨出場先會識緊張。」Alycia又表示最擔心表演時當眾出醜：「呢件事好優美，好驚一陣跌落嚟，我又叫晒啲親戚朋友嚟睇，到時就真係好尷尬，希望安安全全，唔好出醜啦！」