王菀之（Ivana）昨日與張繼聰現身商場活動，阿聰「擦鞋仔」上身，笑言以美食拉攏在影壇地位愈來愈高的Ivana：「嚟緊幾年靠阿之！」氹得Ivana十分開心！

阿聰與Ivana跳入波波池玩，十足大細路！

王菀之昨日與張繼聰及黃美棋等現身太古城中心「波池的海」開幕儀式，談到太極樂隊鼓手朱翰博（Ricky）與戴夢夢一段情，阿聰表示雖然認識Ricky，但並不知情：「呢排將軍澳嗰邊，電視城訊號收得唔係幾好，娛樂新聞淨係追到三月，要過一排先答到大家。」記者轉告事情後，他稱不能評論：「咁係唔簡單，我要睇一睇先，不過我都好多劇本要睇。」

氹到Ivana笑晒

他隨即拉開話題到Ivana身上，表示娛樂新聞只追到Ivana連奪兩個電影獎項，問到可有請對方食飯？Ivana搶答指阿聰貴人事忙。阿聰即化身「擦鞋仔」指想請Ivana食飯：「佢依家電影圈地位愈嚟愈舉足輕重，我都希望可以電影拓展吓，希望請佢食多嘢。」又笑言並非擦鞋，但會向Ivana讚幾句：「希望佢畀隔籬角色我做，嚟緊幾年靠阿之o架喇！」氹得Ivana不停笑。

美棋透露最近忙跟吳綺莉拍電台劇集，對於有報道指吳綺莉假戲真做激動流淚，美棋代為解釋：「佢套劇有情緒病，嗰場天台戲係佢情緒波動，我阻止佢跳樓。（唔係因卓林而喊？）唔係，佢收到消息話個女出咗問題，都好專業拍好晒嘢先處理。」亦指不覺吳綺莉情緒有問題，又笑言不敢關心她：「第一次合作，唔知佢鍾唔鍾意提，不過我會試吓踏前一步同佢傾多。」