昨日《東網巨星》App播出第二十集《我愛發哥》，打女陳嘉桓（Rose）八卦妹上身追問男神周潤發的腿長、三圍及銀包放乜嘢！發哥亦未驚過照爆秘密，更笑言唔使帶錢出街！

喺發哥眼中，大家都係自己人！

Rose話細細個就睇發哥嘅戲，令發哥哭笑不得！

發哥出街嗰陣，閒閒哋都會帶「幾皮」喺身！

Rose：我細細個就睇你嘅戲，我好鍾意《秋天的童話》你個角色呀！

發哥：我就最驚人話細細個就睇我做戲，我都有留意你，你好打得！我知道！

Rose：我知你好高！嗱！我就有42吋長腿，我想知發哥你對腳究竟有幾長呀？如果你唔介意，不如話埋畀我聽你嘅三圍係幾多吖！我好想知呀！

行山助增高

發哥：呢個問題好私人嘅，唔可以立亂公開，女仔就冇咩所謂，男仔一講就唔好，我都有182，最近又行吓山鍊吓骨，師傅話鍊鍊吓又高咗兩cm，咁我會繼續將呢個運動拓展落去，可能過多十年，去到六呎八，嗰陣分分鐘高過你！嗱！我依家着波鞋，我美國碼都着45啦！當然有啲人着到50幾，嗰啲係打籃球，好出名嗰啲。

Rose：我想問吓你，平時出街銀包會袋咩呢？會有幾多錢、幾多信用卡呢？有冇好多散紙呢？又會唔會有同發嫂嘅合照呢？我好想知呀！

發哥：乜都冇呀！淨係帶張車牌、身份證、油卡，幾皮，幾皮唔係幾萬銀，係幾蚊雞，因為我出去買嘢人人都請我食吖嘛！同埋我唔使信用卡，我個樣就係信用，我冇錢！邊個唔信我！唔通周潤發走你數咩！吓話！所以我周圍都係呃呃騙騙飲飲食食，我使乜帶錢出街？大家都係自己人！都係香港人。就算我爬入屋企攞啲嘢走，佢哋都話『隨便隨便』咁！邊個敢收我錢？傻嘅！

「你隻腳真係咁大」

得到發哥慷慨分享私人事，Rose心情大靚，希望下次有機會跟發哥面對面傾偈，繼續八卦：「多謝發哥呀！我會好珍惜今次同你對談嘅機會，原來你隻腳真係咁大，要着咁大號鞋！同埋，我都希望有日可以似你咁，帶少少嘢就可以出街，用自己個嘜頭嚟做信用呀！」

與眾分享銀紫荊星章

「大家都知道發哥拎過影帝，但你哋知唔知佢仲拎過啲咩榮譽呢？原來發哥喺2003年已經獲頒銀紫荊星榮譽勳章喇！佢仲將銀紫荊星章捐畀香港電影資料館，同港人分享喜悅呀！」