三位美少女許雅婷、袁紫僑及溫心組成「少女標本」殺入樂壇，但她們踏上華麗星途後，情路不約而同開始出現分岔口，為了成就星夢，最終被迫犧牲愛情，忍痛與男友分手！

Kabby（左起）、CoCo及溫心三個女仔一個墟，坐埋一齊即雞啄唔斷！

Kabby將情傷寄情歌曲，唱出傷心情歌。

溫心的Solo歌偏向輕快樂觀，襯晒佢個人！

CoCo是個有主見的女孩，遇到真愛必會努力爭取。

許雅婷（Kabby）、袁紫僑（CoCo）及溫心最近從影視圈踩入樂壇，與另一位未有現身的「少女」簡淑兒組成四人女子組合「少女標本」，各人先推出度身訂造的單曲，打正旗號Sell青春。

錄音情緒波動

CoCo的歌曲《幾百萬分之一》講述一個忠於自己的女孩，為了愛人可以不惜一切：「因為鍾意嘅人可能係幾百萬人入面先搵到一個，唔會人哋話唔鍾意就會唔鍾意，呢個性格同我差唔多，細個覺得自己任性，大個發覺其實都係種主見！」但再有主見的女孩，終究也有心軟的時候，CoCo其中一段戀情遭家人大力反對，最終痛斷情絲：「最後個結果唔係咁理想，但諗番起都會有回憶，可能因為工作方面，屋企人覺得我唔應該拍拖，應該專心做嘢，依家大家總算分開，喺唔同地方努力緊。」

而Kabby也經歷過一段淒美的愛情故事，恍如其新歌《人魚之丘》一樣，講述人魚愛上人類的愛情故事：「首歌好似上一段感情，我記得錄音時都諗番起個故事，情緒好波動。當時我同男友背景相差好大，大家工作唔同，佢屋企人唔贊成我做呢行，佢好重家庭觀念，最後都Let It Go（放手），將傷心寄情歌曲，希望佢聽到。」

父母棒打鴛鴦

同是天涯淪落人，溫心的初戀也遭舊愛家長棒打鴛鴦：「我首歌叫《剛剛》，就冇佢哋啲歌咁慘，有啲似少女版兒歌。但我之前有一段戀情有啲似Kabby嘅遭遇，係我初戀嚟，對方比較傳統，佢父母唔鍾意女仔拋頭露面，所以就分開咗！」