藝人董敏莉未來除了繼續做電台DJ外，亦希望可以接一些司儀工作。她又自爆有「黐脷筋」問題，所以正考慮到醫院做「剪脷筋」手術，希望有利踏上司儀之路！

董敏莉希望未來可以多接一些司儀工作。

在電台擔任DJ的董敏莉自爆有「黐脷筋」問題。

在電台擔任DJ的董敏莉（Monie）口才一向不錯，而且語言能力高，能說法語和英語，所以她希望未來可以多接一些司儀工作：「應對同反應方面係要靠經驗去累積！但我呢一年有個小小嘅諗法，因為自己本身有啲黐脷筋，好多時候講嘢條脷幅度郁得細，所以睇吓今年會唔會做『剪脷筋』手術，令司儀工作發展得好啲！」

花心機掩飾

談到大家都聽不出她有「黐脷筋」問題，Monie說：「我其實花咗好多心機去掩飾，依家講嘢個嘴要張到好大先咬得清啲字，但好多時，尤其係工作嘅時候，要顧及儀容，個口太大都驚會嚇親大家！」至於為何突然會有做手術的念頭？她說：「其實好多年前家庭醫生就同我講過呢個問題，當時對我打擊都大，因為由細到大都唔知！不過最搞笑係佢同我講『你黐得唔錯，唔多覺！』所以我嗰時就擺低咗，冇理到！但依家希望向司儀方面發展，希望做手術可以對事業有幫助！」另外，Monie亦創作了自家公仔「小肥英」，她希望未來可以愈做愈大，令3歲到80歲的人都喜歡「小肥英」!