第十九集《我愛發哥》昨日在《東網巨星》App播出,無綫藝員李思捷自爆經常模仿神級影帝周潤發演喜劇,並趁機邀對方飲番兩杯,不過生活健康的發哥大叫咪搞,更叫思捷戒酒!

一向生活健康的發哥,面對思捷「誘」飲酒亦不為所動!

李思捷

思捷:我好欣賞發哥,演技好又拎過影帝,但最鍾意係發哥演喜劇嘅Timing,好準!佢好睇之處係靚仔,《精裝追女仔》演追女仔戲分外好睇,加埋佢以喜劇方法,成件事好自然,唔係誇咁做,我鍾意睇喜劇,長大之後除咗睇許冠文,第二個就係周潤發,未到周星馳個Generation,我覺得佢Timing好準,同埋佢演喜劇個Key係好高,高八度,陳錦鴻都係學佢!

發哥:你都犀利吖李思捷,又唱得又跳得又Talk得,犀利到不得了,我封你做偶像,我有睇你啲騷!你瓣瓣都掂,我好似你咁就真係不得了,我好欣賞你,多謝你讚許我!

思捷:唔知發哥你識唔識我呢?其實我好多戲都係抄你!

發哥:你又好嘢,我睇唔到你抄咗我啲咩,我覺得你演嘅所有戲都係李思捷自己,唔覺有周潤發影子,就算你之前有啲想做到周星馳咁,我都覺得係你自己風格,每個演員有自己抄嘅階段,之後就有樣嘢屬於自己,依家李思捷好多嘢都係你自己,冇人學到你,我都學唔到你。

思捷:發哥我知你好注重身體健康,但我想問你,你飲唔飲酒?第日出嚟飲兩杯吖!

發哥:呢樣嘢就唔好搞我,我見到你喺你個節目度,咁樣隊人,造啲色落去好喇!會死人呀!細細杯細細杯嗰啲唔知咩嚟,五顏六色,喂!你都唔好飲咁多喇!你飲開酒嘅,同我哋呢啲唔飲酒嘅,我哋唔啱傾,你搵過第二樣嘢同我傾啦!好嘛?

慘食檸檬照High爆

雖然「食檸檬」,但得到偶像回應,思捷一樣High爆,笑言可轉約發哥飲茶:「飲茶吖冇所謂!你鍾意食咩我就同你食啦!最多唔飲酒啫!希望我好似你咁帶多啲娛樂畀大家啦!我真係唔知你識我!你咁樣讚我,我真係開心到不得了!你係我目標,多謝發哥!」