夏春秋周嘉莉 為六時代重出江湖

六合彩成就了每一位香港人的發達夢！39年來都吸引觀眾「坐定定」在電視機前收看直播，惟《on.cc東網》將打破傳統慣例，讀者可透過手機下載《on.cc東網》App，並於6月16日起以《on.cc東網》App收看六合彩直播，即使不在家中亦可全程直擊，《on.cc東網》更開創史上首次透過手機收睇六合彩直播的先河，史稱「六時代」！而「六合彩之父」夏春秋及「六合彩之女」周嘉莉亦重出江湖參演《六時代》短片，暢談主持六合彩以來的秘聞與趣事……

生鬼「財神」成功入屋

最令人印象深刻的六合彩主持，實非有「六合彩之父」之稱的夏春秋莫屬！夏春秋主持六合彩達十八年之久，其生鬼的主持方式令人印象難忘：「當初搵我做主持，都係鍾意我主持嘅風格搞鬼啲，有時攪出連續號碼我會話：『嘩！又嚟一對姊妹號碼喇！』」對夏春秋而言，六合彩是一個節目而非報道，可令他想出不同主持方法，惟他後來因移民而辭任。回憶十八年來的主持點滴，夏春秋見證着六合彩的變遷，由當初一星期兩日開彩及只有36個攪珠號碼，改為一星期開彩三至四日兼增至49個攪珠號碼：「以前一注先兩蚊，多寶獎有400萬已經好犀利喇！」其主持六合彩的形象深入民心，即使「退休」多年，夏春秋每次出街仍被街坊認出：「依家出街都有人話我係財神，仲有啲後生師奶話細細個一開六合彩就坐喺電視隔籬睇我報，話要幫阿媽寫低喎！」

問到現時的六合彩與當年有何不同，夏春秋說：「差好遠！以前攪珠室得一塊木板隔開啫，依家有鎖，出入都要登記，專業好多！」他又分享「執生」經歷：「當年只有一部攪珠機，有次開彩前突然失靈，工作人員同我都非常焦急，後來諗到賽馬會有部早年用嚟抽馬票嘅機器，就『頂硬上』，令當晚嘅六合彩順利開出，過程驚險但總算完成！」直播節目令人緊張萬分，夏春秋更指當年最「頭痕」的是無法請假：「做直播節目係緊張啲，好難搵人頂更，時間要控制得好，試過一次搵驃叔（董驃）頂，佢做完一次就話以後都唔做！」對於當年因移民辭職，他卻未感可惜：「人生就係變o架啦！搵後生仔女主持又有唔同效果！（想唔想再主持番？）又冇技癢嘅，如果有大慶典搵我主持都無任歡迎！」他最希望到2025年，已屆92歲的他有機會主持六合彩金禧紀念。

難搵替工 空肚上陣

至於新一代「六合彩之女」周嘉莉因簽約亞視而主持六合彩一年多，惟目前約滿亞視而停止主持：「呢個係亞視嘅王牌節目，曝光率好高，作為新人嘅我好多謝公司畀機會！」她表示做直播節目令她緊張不已，更擔心會突然肚痛而不敢吃晚餐，故要待節目完成後才敢用餐。嘉莉亦認同夏春秋所言「難搵替工」：「試過有次病得好嚴重，另一拍檔又唔喺香港，即使又暈又發燒都要頂硬上，藥都唔敢食，驚眼瞓，主持真係要集中精神，一唔留神就會Miss咗重點！」但她卻化壓力為動力：「其實模式一樣，但每次受惠機構都唔同，要直播前背好稿，最難係要用30秒介紹受惠機構，大概180字，要節奏快但又要清楚！」問到難忘經歷？她最深刻的是螢幕打錯中獎號碼而要即時「執生」：「攪出嗰個係特別號碼，但螢幕出咗正常號碼，如果係二獎同頭獎就分別好大啦，當時只有一至兩秒等我行去攪珠機度報號碼，螢幕就即刻改咗，嗰次都有上新聞！」

兩代六合彩主持各有經歷，嘉莉讚揚夏春秋是六合彩的傳奇人物，更希望與他合作主持滿足心願；夏春秋則表示年輕一代的主持要將精神傳揚下去！