組合Super Girls（SG）成員Jessica（蔡明芳）是隊中最不起眼兼最年長，由於隊員各有「睇頭」令工作量大增，相反苦等機會的她曾因樣貌遭導演嫌棄，她直言是人生最痛，自卑的她憶述過程時忍不住爆喊，雖然過去受盡不少冷眼，但她抱着「希望在明天」心態，不斷自我增值，待機會來時能好好把握。

Jessica於組合中發展平平，但仍視娛圈工作為人生目標。

沒有家庭經濟負擔，Jessica放心追夢。

Super Girls出道以來，成員各有發展。

現年28歲的SG成員Jessica，求學時兼職模特兒，後獲經理人公司簽約成為藝人，以組成女子組合Super Girls勇闖樂壇，奈何其他成員均較年輕及標青，難免打擊她的自信，Jessica承認：「本身冇乜自信，可能個樣比較平凡，加上跳舞、唱歌未必好叻，好多嘢唔及其他成員。（過程辛苦？）辛苦係內心掙扎，見到其他成員獨立發展時，對自己前路比較迷惘，呢行唔係只靠努力，運氣都好緊要。」信佛的Jessica認為未來的路早已注定，她說：「成日同自己講，唔緊要啦，所有嘢係注定，如果唔係我爭嚟都冇用，係我嘅永遠都喺我手。」Jessica透露初入行時最怕見記者：「記者朋友會逐個成員問最近忙啲咩，唯獨我係冇嘢做，會怕呢啲問題，每次答嘅嘢就係：『我依家努力學唱歌同跳舞。』好多朋友叫我增值自己，當機會嚟時好好把握，所以我咬緊牙關去學唱歌、跳舞、樂器。」

母親打擊成為動力

Jessica提到當年電影面試，由於只有四個角色，而SG五女一齊試鏡，最終她因樣貌不及其他隊友而遭嫌棄，她說：「我做嘢從來唔會抱好大期望，驚有期望就有失望，所以平常心，唔夠膽有『我一定要』嘅心態。（成日被彈？）無奈嗰次真係揀剩我，嗰刻勁唔開心，係入行最唔開心一次。」身為家中長女的Jessica為免家人擔心，只報喜不報憂，但由於當時是一生最痛，她最終亦與母親分享，她憶述時嗚咽口震震說：「媽咪以前做粵劇，負責選主角同配角，佢明白挑選人呢種心對於人係唔好，所以一啲都唔想我行呢條路，嗰次我講到喊，聽完媽咪講嘢就舒服好多。」

對人歡笑背人愁的Jessica為發洩心中不快，躲於房間大喊一場：「返到屋企匿埋房自閉，失控咁爆喊同自己講嘢，係入行最失控一次。」當提到母親口硬心軟時，Jessica終於淚流滿面，並說：「冇話想要佢鼓勵我，只想搵一個人去傾訴，而佢係我最信任嘅人，雖然知道佢講嘅嘢一定唔係我想聽，佢講嘢好倔唔會安慰我，覺得安慰冇用，淨係會打擊我令我更加強。」家境不俗的Jessica感激母親從未給予經濟壓力，她說：「反而係自己畀壓力自己，希望幫屋企人分擔，其實媽咪唔需要我呢份人工，只係我心安理得，依家有穩定收入可以畀錢屋企，媽咪每次都同我講唔使，但我覺得呢個係責任，寧願使少啲都畀錢佢。」

視演戲為人生目標

Jessica以「風趣」形容母親，她說：「雖然佢成日喺朋友面前話做呢行邊有用，但佢好支持我，成日講：『又唔一早做，依家先嚟做邊有用吖！』雖然好似鬧我，但每晚排完舞返屋企，佢都煲定湯擺喺廚房，又會傳短訊叫我早啲瞓。」Jessica承認一講到家人就是其致命傷：「講屋企人最易喊，覺得對媽咪唔住，最細嘅妹妹就快畢業，希望媽咪之後日子過得舒服啲，想快啲畀佢退休，我嘅夢想係快啲買樓畀媽咪住。」近年對演戲充滿濃厚興趣的她透露找到人生目標：「從來冇一樣嘢好有目標，依家對演戲好有興趣，會去研究，覺得船到橋頭自然直，所以近日開始上演戲課。」

後記

Jessica性格慢熱兼不多話，不懂她的人往往因她欠笑容而聯想到「臭寸」，但認識後發現她其實是「傻大姐」一名，有話直說，不為利益出賣尊嚴。訪問當日，她提到母親時即雙眼通紅，多次欲拉開話題，最後仍淚如雨下；訪問完畢，有禮的她即場致歉。筆者可算是睇住Jessica成長，相信她咬緊牙關必能戰勝重重障礙。