在英國修讀「巴黎藍帶廚藝學院課程」大半年的名模蔣怡（CoCo），起初因與老公及囡囡分隔兩地，不禁日日以淚洗面：「第一個星期好似一年咁長，加埋掛住小朋友同屋企，基本上每次同佢傾視像電話，都係一路喊住一路講。」CoCo更大爆囡囡在她離家兩個月後已記不起自己！身兼學生及母親身份的CoCo直言壓力沉重，慶幸獲家人鼓勵令她支撐至今。

蔣怡毅然放低一切，遠赴倫敦追夢。

本身為飲食節目主持的CoCo，畢業後有意大搞私房菜分享美食，更不排除會開班，親任導師傳揚親子下廚樂：「有時我喺屋企整Macaron，都會叫埋囡囡一齊篩粉，跟住整完Macaron我會畀佢，同佢一人一邊合番埋，我覺得係個好好嘅溝通方式同親子活動。」CoCo更表示有意追仔為囡囡添個伴。