葉麗儀：家人對我最緊要

殿堂級歌手葉麗儀（Frances）今年一月於伊館完成三場《45年香港情演唱會》，相隔數月，其演唱會CD和DVD最近亦已推出，她笑言可為籌備近一年的演唱會做個小紀念：「好似有張成績表咁睇吓做咗啲咩，好開心，圓咗一個夢，做咗45年都唔係交白卷，有啲功課交番出嚟。」她透露無心插柳在1969年參加無綫EYT的《聲寶之夜》，並多得顧嘉煇提攜而入行：「好幸運可以走咗呢條路45年，當中經歷好多，有啲事唔係個個都知，所以想將我當中嘅感受喺演唱會同大家分享。」

結尾歌曲表心意

談到演唱會期間的難忘事，Frances表示最難忘是兒子在頭場演唱會專程從悉尼飛回港給她驚喜：「我唱埋Closing嘅歌，跟住諗住落台換衫出嚟做Encore，突然間我個仔走上嚟獻花，我見到佢嗰刻就好驚訝咁問：『你喺度做咩？』之後就開始喊，諗唔到佢專登由悉尼飛返嚟！」此時她亦感動得眼濕濕：「見到佢唔識講嘢，佢話要上嚟同我講聲祝賀，仲話：『多謝你咁錫我』，真係好感動！」她又表示今次演唱會結尾歌曲《時間都去哪兒了》是她的心意：「首歌講一個年紀比較成熟嘅人回顧番仔女長大嘅情況，突然發覺原來自己已經年老，究竟啲時間去晒邊？首歌可以將我心裏感受好仔細講出嚟，因為去到依家嘅人生地步，家人對我最緊要。」

不捨顧嘉煇退休

工作方面，Frances早前有份參與樂壇教父顧嘉煇的《榮休盛典演唱會》，她表示與十二位藝人晚晚一起演出很開心，他們亦會在後台互相照顧，而且每晚都有人在後台萬歲，並坦言有點不捨顧嘉煇退休：「但天下無不散之筵席，而且佢都82歲，想真正有多啲時間畫畫，同埋佢有靈感都會繼續作曲。」她又大讚顧嘉煇是「真真正正嘅好好先生」：「佢好有耐性，肯提攜新人，而且冇乜脾氣，做得唔理想嘅話，最壞嗰句係『乜咁o架！』最好嗰句係『幾好呀！』所以永遠唔會鬧你。」提到新一代歌手張敬軒和謝安琪（Kay）亦有份參與該盛典，她即大讚二人：「Kay晚晚唱《明日之歌》同《奮鬥》都唔容易，但佢唱得好好，同埋好勤力，晚晚喺化妝間總係會曲不離口。而軒仔就好尊師重道，好有禮貌，而且有上進心，同埋把聲好靚，有自己風格。（有機會想同佢哋合作？）絕對唔會抗拒同佢哋合作！」