無綫「福將」歐陽震華(Bobby)不獲續約,震驚無綫上下!Bobby昨日得聞多人力撐而大感人間充滿「正義感」,並揚言「只想攞番個公道」!而樂易玲否認有向他說「有啱先搵你」,並猜測是言語間誤會,更與曾勵珍齊齊出動「留人」!

Bobby坦言未有為不獲續約事件感不快!(資料圖片)

曾勵珍「身負重任」與Bobby傾約。(資料圖片)

樂易玲(資料圖片)

陳豪極欣賞Bobby的劇作與演技,故為他不獲續約一事感意外!

不獲無綫續約的無綫「福將」歐陽震華(Bobby)昨日得多人力撐而大感正義感長存,他在電話中說:「估唔到咁大回響!好多人戥我唔抵為我發聲,好有正義感,有啲嘢要講清楚理由!(唔開心?)冇!只想攞番個公道,心理上平衡吓,亦唔想畀第三者隨意演繹我嘅說話畀無綫知!(珍姐依家全權負責傾約會答應?)簽唔簽都冇所謂,我都係啱先接,最緊要合作過程愉快,等如傾生意,我唔係i撈!」而無綫製作資源部總監樂易玲昨日就Bobby不獲續約一事透過電話回覆:「點會唔想簽Bobby呢?當日同同事去見Bobby經理人,一齊傾續約細節,件事都未傾完,而我從冇聽過亦唔相信有同事講過『有啱先搵你』呢句話,我估係言語間嘅誤會!(珍姐跟進?)我哋會再約Bobby傾合約細節。」

易話為 錫住用

無綫戲劇製作總監曾勵珍亦臨危受命出面與Bobby傾約,她昨日接受電話訪問時說:「一直都傾緊,亦有同佢經理人聯絡,Bobby係唔高興一啲嘢啫。(佢道氣消咗未﹖)唔知喎!都叫佢唔好傷身,唔緊要啦,都係言語上嘅嘢,我睇住佢大會錫住佢。(Bobby續約有冇特別要求?)冇,佢好易話為!」珍姐又表示會為Bobby度身訂造劇本:「之前佢身體麻麻,都同監製講要睇住佢,好似小朋友、年長演員咁,佢係受保護動物,大熱天時唔會開古裝畀佢。」

陳豪:唔續約可惜!

對於Bobby不獲公司續約,陳豪昨日出席新劇拜神時大感愕然:「Bobby以前已經係大哥、忠臣,好欣賞佢,咁耐以嚟都係睇佢嘅劇大,如果唔獲續約真係好可惜!(奇怪?)聽到都覺得好意外,以Bobby分量,究竟發生咗咩問題?(依家話曾勵珍插手留人?)公司可能有佢嘅部署,除非Bobby唔想續,唔係都冇咩原因唔同佢續……」另外,梁思浩、高鈞賢及陸駿光昨日錄影nowTV節目《娛樂審死官》,對於Bobby不獲續約一事,梁思浩懷疑與製作資源部總監樂易玲有關,並不斷攻擊她,同時為Bobby感不值:「怒火中燒,佢唔係為錢工作,只求開心,係位無欲無求嘅好演員。」