第十四集《我愛發哥》昨日在《東網巨星》App播出，前港姐黃心穎「好奇寶寶」上身，問男神周潤發最想與甚麼人對換身份，幽默的發哥竟想做「開心醫生」，幫人做「開心」手術！

發哥希望做一日開心醫生，幫人做「開心」手術，真係講起都開心！

黃心穎激讚發哥親民之餘，更經常為大家發放正能量。

心穎：發哥你好！我係黃心穎，唔知你識唔識得我，我好欣賞發哥，首先係好錫老婆，雖然係Super Star，依然好親民，係我哋後輩一個好好嘅榜樣。另外我覺得你好關心香港，呢樣令全港人好驕傲，畀好多正能量大家。

發哥：呢個又啱嘅，你喺自己屋企，周圍都係自己人嘛！你有咩咁巴閉啫！就算係特首、有錢人，都係隔籬鄰舍之嘛！有啲直頭打開隻窗都握到手啦！香港地邊個舊時唔係徙置區出嚟？有咩咁巴閉，大家都係同一隻船，獅子山下，擔泥擔水嘅人出身，唔使為我驕傲，我驕傲你多過驕傲我自己。

心穎：如果你唔做演員或攝影師，最想做咩？

發哥：我幾時做過攝影師？我都冇揸過機，如果我唔做戲，咁最好就係返去做農夫啦！依家啲田貴過啲屋呀！搵到食！但一定要有機，有機先賣到錢。

心穎：如果你可以同一個人對換身份一日，你會揀咩呢？

發哥：嘩！呢條問題，好有興趣！係話做48小時定24小時？都冇所謂！我想做個開心醫生，真係劏開個心，幫人搭橋，醫番好人，咁呢個開心醫生真係好開心！我想做醫生做一日！開心喎！真係同人開心嗰啲開心喎！開完佢唔死得我就更加開心，死咗冇辦法啦！哈哈！我都盡晒力啦！我真係好想做個開心醫生！

萌爆口音夠Cutie

心穎大讚發哥口音特別Cute：「估唔到發哥真係答我啲問題，有啲受寵若驚，同埋佢好得意，講嘢時有個口音，唔知係特登玩定點，萌萌哋，好Cute！估唔到佢最後答係做開心醫生，我當時諗自己係做雨水，去其他地方，然後滴番落嚟做飲用嘅水，好開心得到發哥嘅回覆，多謝發哥！」