《我愛發哥》專題又返嚟喇！第十一集昨日在《東網巨星》App播出，見到宅男女神吳若希（Jinny），不老男神周潤發笑言尋回年輕感覺，更不禁哼起歌來：「青春！真可愛青春！」

發哥笑言若重出江湖拍劇，最多只可一日拍12個鐘。

Jinny睇到發哥嘅幽默回應即笑到四萬咁口！

Jinny：我鍾意佢為人冇乜架子，見咩人都會自拍，我都想試吓野生捕獲發哥！

發哥：有機會！多啲坐港鐵！

Jinny：知你鍾意睇TVB劇集，咁你有冇睇過《衝線》？

發哥：唔好意思！呢套戲啱啱撞着我好忙嘅時候，要兩邊飛做宣傳，我睇過啲Promo（宣傳片）嘅，靚仔靚女又踩單車，踩到去台灣嘛！風景靚，單車衫又型，總言之型仔型女，青春劇，大家都希望有青春，我都希望有青春，好似陳寶珠舊時隻歌咁：「青春，真可愛青春！」好睇嘅呢套劇應該，我第時喺網度撈番嚟睇，先再答你！

極限連拍12個鐘

Jinny：發哥會唔會返TVB拍劇？如果會我就全力自薦，希望可以同你做對手戲！

發哥：唔知返嚟可以拍啲咩喎！佢哋又冇Approach（接觸）我喎！如果有好劇本我都唔介意，但啲時間呢，就唔可以捱咁長，12個鐘頭內我都頂得順嘅，希望佢哋有好劇本搵吓我，不過都要太太同意先得。（Jinny：好好呀，發哥好錫屋企呀！）

想盡辦法合作

得到發哥的神級回覆，平日已愛笑的Jinny更加笑到見牙唔見眼，繼續鍥而不捨諗計想和發哥合作，她說：「好搞笑發哥！原來佢講嘢係咁樣，佢仲話上網撈番嚟睇喎！好多謝發哥！你快啲返嚟拍劇啦！我哋都好想同你學吓嘢，你覺得咩為之好嘅劇本呀？不如你諗一個幾好嘅角色出嚟，我咪可以同公司講！咁公司咪可以開囉！我哋咪可以合作囉！」